ఢిల్లీకి ఊపిరాడట్లేదు.. 15వ రోజూ ప్రమాదకరంగానే వాయు కాలుష్యం!

దేశ రాజధాని ఢిల్లీలో వాయు కాలుష్యం తీవ్రత ఏమాత్రం తగ్గడం లేదు. వరుసగా 15వ రోజు కూడా గాలి నాణ్యత ‘వెరీ పూర్’ (చాలా తక్కువ) కేటగిరీలోనే నమోదైంది. కేంద్ర కాలుష్య నియంత్రణ మండలి (సీపీసీబీ) శనివారం ఉదయం 7 గంటలకు విడుదల చేసిన డేటా ప్రకారం, ఢిల్లీ ఎయిర్ క్వాలిటీ ఇండెక్స్ (ఏక్యూఐ) 338గా రికార్డయింది.
 
శుక్రవారం నమోదైన 385 ఏక్యూఐతో పోలిస్తే ఇది స్వల్పంగా మెరుగుపడినప్పటికీ, పరిస్థితి ఆందోళనకరంగానే ఉంది. నవంబర్ నెలలో దాదాపు ప్రతీరోజూ గాలి నాణ్యత ప్రమాదకర స్థాయిలోనే కొనసాగుతోంది. వాతావరణ పరిస్థితులు కాలుష్య కారకాలు చెదిరిపోవడానికి అనుకూలంగా లేనందున, రానున్న వారంలో కూడా పరిస్థితిలో పెద్దగా మార్పు ఉండకపోవచ్చని వాతావరణ ఏజెన్సీలు అంచనా వేస్తున్నాయి.
 
శనివారం ఉదయం ఢిల్లీలోని ఆనంద్ విహార్ (354), అశోక్ విహార్ (347), బవానా (364), చాందినీ చౌక్ (351), ద్వారక సెక్టార్ 8 (368), ఐటీఓ (343) వంటి చాలా ప్రాంతాల్లో కాలుష్యం తీవ్రంగా ఉంది. అయితే ఐజీఐ ఎయిర్‌పోర్ట్ (295), దిల్షాద్ గార్డెన్ (272) వంటి కొన్ని చోట్ల మాత్రం గాలి నాణ్యత ‘పూర్’ కేటగిరీలో నమోదైంది.
 
ఢిల్లీని ఆనుకుని ఉన్న ఎన్‌సీఆర్ నగరాల్లోనూ ఇదే పరిస్థితి నెలకొంది. నోయిడాలో ఏక్యూఐ 344, ఘజియాబాద్‌లో 333, గురుగ్రామ్‌లో 293గా రికార్డయింది. ఇదిలా ఉండగా, శనివారం పొగమంచు ఉంటుందని, గరిష్ఠ ఉష్ణోగ్రత 26 డిగ్రీలు, కనిష్ఠ ఉష్ణోగ్రత 11 డిగ్రీల సెల్సియస్ వద్ద నమోదయ్యే అవకాశం ఉందని భారత వాతావరణ శాఖ (ఐఎండీ) తెలిపింది.