Indian Stock Market: తొలిసారి 86,000 దాటిన సెన్సెక్స్.. నిఫ్టీ ఆల్ టైమ్ హై

భారత స్టాక్ మార్కెట్లు సరికొత్త చరిత్ర సృష్టించాయి. గురువారం ట్రేడింగ్‌లో సెన్సెక్స్, నిఫ్టీ సూచీలు ఆల్ టైమ్ గరిష్ఠ స్థాయులను నమోదు చేశాయి. సెన్సెక్స్ తొలిసారిగా 86,000 మార్కును దాటి 86,026.18 వద్ద కొత్త రికార్డు సృష్టించగా, నిఫ్టీ సైతం 26,306.95 వద్ద జీవనకాల గరిష్ఠాన్ని తాకింది. అమెరికా, భారత్‌లలో వడ్డీ రేట్లు తగ్గుతాయన్న అంచనాలు, విదేశీ పెట్టుబడుల వెల్లువ మార్కెట్ సెంటిమెంట్‌ను బలపరిచాయి.

విదేశీ పోర్ట్‌ఫోలియో ఇన్వెస్టర్లు (FPI) వరుసగా రెండో రోజు కూడా నికర కొనుగోలుదారులుగా నిలిచారు. బుధవారం ఒక్కరోజే రూ. 4,778.03 కోట్ల విలువైన భారత ఈక్విటీలను కొనుగోలు చేయడం మార్కెట్లకు భారీ ఊతమిచ్చింది. అంతకుముందు రోజు మంగళవారం సైతం వీరు రూ. 785.32 కోట్లు పెట్టుబడిగా పెట్టారు. ఈ స్థిరమైన కొనుగోళ్లతో దేశీయ మార్కెట్లు దూసుకుపోతున్నాయి.

మరోవైపు ప్రపంచ మార్కెట్ల నుంచి వస్తున్న సానుకూల సంకేతాలు కూడా సూచీల ర్యాలీకి దోహదపడ్డాయి. అమెరికా ఫెడరల్ రిజర్వ్ డిసెంబర్‌లో వడ్డీ రేట్లను తగ్గిస్తుందన్న అంచనాలు 85 శాతానికి చేరడంతో అంతర్జాతీయంగా ఇన్వెస్టర్లలో ఉత్సాహం నెలకొంది. దీనికి తోడు వచ్చే వారం ఆర్‌బీఐ ద్రవ్య పరపతి విధాన సమావేశం జరగనున్న నేపథ్యంలో మదుపరులు సానుకూలంగా వ్యవహరిస్తున్నారు.

నిఫ్టీ50లో బజాజ్ ఫైనాన్స్, శ్రీరామ్ ఫైనాన్స్, ఏషియన్ పెయింట్స్, బజాజ్ ఫిన్‌సర్వ్, లార్సెన్ అండ్ టూబ్రో వంటి షేర్లు 2 శాతం వరకు లాభపడి మార్కెట్లకు మద్దతుగా నిలిచాయి. ఆసియా, అమెరికా మార్కెట్లు కూడా లాభాల్లో ట్రేడ్ అవ్వడం దేశీయ సూచీల జోరుకు అదనపు బలాన్నిచ్చింది.