క్రూయిజ్ కంట్రోల్‌తో హీరో ఎక్స్‌ట్రీమ్ 160ఆర్ 4వీ.. 160సీసీ సెగ్మెంట్‌లో ఇదే తొలి బైక్!

ప్రముఖ ద్విచక్ర వాహన తయారీ సంస్థ హీరో మోటోకార్ప్, తన పాపులర్ మోడల్ ఎక్స్‌ట్రీమ్ 160Rలో సరికొత్త వేరియంట్‌ను భారత మార్కెట్లో విడుదల చేసింది. క్రూయిజ్ కంట్రోల్, రైడ్-బై-వైర్ థ్రాటిల్ వంటి అడ్వాన్స్‌డ్ ఫీచర్లతో వచ్చిన ఈ హీరో ఎక్స్‌ట్రీమ్ 160R 4V వేరియంట్ ధరను రూ.1,34,100 (ఎక్స్-షోరూమ్)గా నిర్ణయించింది. ఇది స్టాండర్డ్ మోడల్ కంటే సుమారు రూ. 4,500 అధికం.

ఈ కొత్త వేరియంట్ ప్రత్యేకత ఏమిటంటే, 160cc సెగ్మెంట్‌లో రైడింగ్ మోడ్స్‌ను అందిస్తున్న తొలి బైక్ ఇదే కావడం. రైడర్లు తమకు అనుకూలంగా రెయిన్, రోడ్, స్పోర్ట్ అనే మూడు మోడ్స్‌ను ఎంచుకోవచ్చు. హ్యాండిల్‌బార్స్‌పై కొత్తగా అమర్చిన స్విచ్‌ల ద్వారా ఈ మోడ్స్‌ను, క్రూయిజ్ కంట్రోల్‌ను సులభంగా ఆపరేట్ చేయవచ్చు.

ఇంజన్ విషయానికొస్తే, పాత మోడల్‌లో ఉన్న 163.2cc సింగిల్-సిలిండర్, ఎయిర్/ఆయిల్-కూల్డ్ ఇంజన్‌నే ఇందులోనూ కొనసాగించారు. ఇది 8,500rpm వద్ద 16.9hp శక్తిని, 6,500rpm వద్ద 14.6 Nm టార్క్‌ను ఉత్పత్తి చేస్తుంది.

డిజైన్‌లో కూడా పలు మార్పులు చేశారు. ఎక్స్‌ట్రీమ్ 250R నుంచి స్ఫూర్తి పొందిన కొత్త ఎల్ఈడీ హెడ్‌లైట్, 4.2-అంగుళాల కలర్డ్ ఎల్‌సీడీ ఇన్‌స్ట్రుమెంట్ కన్సోల్, తాజా గ్రాఫిక్స్, నాలుగు కొత్త రంగుల ఆప్షన్స్‌తో ఈ బైక్ స్పోర్టీ లుక్‌ను సొంతం చేసుకుంది. ఇప్పటికే ఎక్స్‌ట్రీమ్ 125R, గ్లామర్ ఎక్స్ వంటి మోడళ్లలో హీరో ఈ టెక్నాలజీని పరిచయం చేసిన విషయం తెలిసిందే.