Naga Chaitanya: నాగ చైతన్య కొత్త సినిమా.. పవర్‌ఫుల్ టైటిల్‌తో ఫస్ట్ లుక్ విడుద‌ల‌

యువ సామ్రాట్ అక్కినేని నాగ చైతన్య తన పుట్టినరోజు సందర్భంగా అభిమానులకు ప్రత్యేక కానుక అందించారు. ఆయన కథానాయకుడిగా నటిస్తున్న 24వ చిత్రం (NC24) టైటిల్‌ను, ఫస్ట్ లుక్‌ను చిత్రబృందం అధికారికంగా ప్రకటించింది. ఈ సినిమాకు ‘వృషకర్మ’ అనే పవర్‌ఫుల్ టైటిల్‌ను ఖరారు చేశారు. సూపర్ స్టార్ మహేశ్ బాబు సోషల్ మీడియా ద్వారా ఈ టైటిల్ పోస్టర్‌ను విడుదల చేసి, నాగ చైతన్యకు పుట్టినరోజు శుభాకాంక్షలు తెలిపారు. చైతన్య లుక్ ఆకట్టుకునేలా ఉందని ప్రశంసించారు.

'విరూపాక్ష' చిత్రంతో బ్లాక్‌బస్టర్ అందుకున్న కార్తీక్ దండు ఈ చిత్రానికి దర్శకత్వం వహిస్తున్నారు. ‘వృషకర్మ’ అనేది సంస్కృత పదం కాగా, తాను చేసే పనిపై పూర్తి శ్రద్ధ పెట్టి దాన్ని సాధించేవాడు (కార్యసాధకుడు) అని అర్థం. ఈ టైటిల్ నాగ చైతన్య పాత్ర స్వభావానికి అద్దం పడుతుందని చిత్ర యూనిట్ పేర్కొంది. మైథలాజికల్ థ్రిల్లర్ జానర్‌లో ఈ సినిమా తెరకెక్కుతోంది. 'విరూపాక్ష' తరహాలోనే ఉత్కంఠభరిత కథనంతో, అద్భుతమైన విజువల్స్‌తో ఈ సినిమా ఉండనుందని తెలుస్తోంది.

ఈ చిత్రంలో నాగ చైతన్య సరసన మీనాక్షి చౌదరి కథానాయికగా నటిస్తున్నారు. 'కాంతారా' ఫేమ్ అజనీష్ బి లోక్‌నాథ్ సంగీతం అందిస్తున్నారు. ప్రముఖ దర్శకుడు సుకుమార్ రైటింగ్స్ భాగస్వామ్యంతో బీవీఎస్ఎన్ ప్రసాద్ ఈ చిత్రాన్ని నిర్మిస్తున్నారు.