మోదీ, మెలోనీ మధ్య మరోసారి విరబూసిన నవ్వులు... వీడియో ఇదిగో!

ప్రధాని నరేంద్ర మోదీ, ఇటలీ ప్రధాని జార్జియా మెలోనీ మధ్య ఉన్న ప్రత్యేక స్నేహబంధం మరోసారి అందరి దృష్టిని ఆకర్షించింది. దక్షిణాఫ్రికాలోని జొహాన్నెస్‌బర్గ్‌లో జరుగుతున్న జీ20 దేశాధినేతల సదస్సులో ఈ ఇద్దరు నేతలు ఆప్యాయంగా పలకరించుకున్నారు. వారి మధ్య చిరునవ్వులు విరబూశాయి. సదస్సు ప్రారంభానికి ముందు ఇరువురు నేతలు కరచాలనం చేసుకుని, స్నేహపూర్వకంగా సంభాషించుకున్నారు.

ఇటీవల ఇటలీ ప్రధాని మెలోనీ రాసిన 'ఐ యామ్ జార్జియా' అనే పుస్తకానికి ప్రధాని మోదీ ముందుమాట రాయడం వారి మధ్య ఉన్న గౌరవాన్ని తెలియజేస్తుంది. "భారత్, ఇటలీ మధ్య సాన్నిహిత్యానికి ఇరు దేశాల నాగరికత, వారసత్వ పరిరక్షణ, మహిళా శక్తిని గౌరవించడం వంటి ఉమ్మడి అంశాలే పునాది" అని మోదీ ఆ ముందుమాటలో పేర్కొన్నారు.

మోదీ ముందుమాటపై మెలోనీ కూడా స్పందిస్తూ హర్షం వ్యక్తం చేశారు. "ప్రధాని మోదీ మాటలు నా మనసును ఎంతగానో తాకాయి. ఆయనపై నాకు అపారమైన గౌరవం ఉంది. ఇరు దేశాల మధ్య ఉన్న బలమైన బంధానికి ఆయన మాటలే నిదర్శనం" అని ఇటలీకి చెందిన ఓ వార్తా సంస్థతో వ్యాఖ్యానించారు. 

చివరిసారిగా వీరిద్దరూ జూన్‌లో కెనడాలో జరిగిన జీ7 సదస్సు సందర్భంగా సమావేశమయ్యారు. వారిద్దరి మైత్రిని ప్రతిబింబించేలా, ఇరువురి పేర్లను కలిపి 'మెలోడీ' (మెలోనీ-మోడీ) అనే హ్యాష్ ట్యాగ్ కూడా సోషల్ మీడియాలో వైరల్ అయింది.

కాగా, జొహాన్నెస్‌బర్గ్‌లో జరుగుతున్న ఈ జీ20 సదస్సుకు ఫ్రాన్స్ అధ్యక్షుడు ఇమ్మాన్యుయేల్ మెక్రాన్, చైనా ప్రీమియర్ లీ చియాంగ్, బ్రెజిల్ అధ్యక్షుడు లూలా డ సిల్వా, టర్కీ అధ్యక్షుడు ఎర్డోగాన్ వంటి పలువురు ప్రపంచ నేతలు హాజరయ్యారు. అయితే, అమెరికా అధ్యక్షుడు మాత్రం ఈ సదస్సుకు దూరంగా ఉన్నారు.