ఢిల్లీ గాలి పీల్చలేకపోతున్నా... ఇక్కడ జీవించడం కష్టమే: జాంటీ రోడ్స్

దక్షిణాఫ్రికా క్రికెట్ దిగ్గజం, ప్రపంచంలోని అత్యుత్తమ ఫీల్డర్లలో ఒకరైన జాంటీ రోడ్స్ ఢిల్లీ వాయు కాలుష్యంపై తీవ్ర ఆందోళన వ్యక్తం చేశాడు. ప్రస్తుతం తన కుటుంబంతో గోవాలో నివసిస్తున్న రోడ్స్, ఢిల్లీకి రాగానే గాలిలో నాణ్యత ఎంత దారుణంగా ఉందో వెంటనే అర్థమైందని అన్నాడు. ఈ కాలుష్య వాతావరణంలో పిల్లలను బయటకు వెళ్లి ఆడుకోమని ప్రోత్సహించడం ఎలా సాధ్యమని ఆవేదన చెందాడు. ఎన్డీటీవీకి ఇచ్చిన ప్రత్యేక ఇంటర్వ్యూలో రోడ్స్ ఈ కీలక వ్యాఖ్యలు చేశాడు.

"మేము గోవాలో సముద్రం పక్కన నివసిస్తాం. అక్కడ పరిశ్రమలు తక్కువ, గాలి ఎప్పుడూ స్వచ్ఛంగా ఉంటుంది. కానీ ఢిల్లీకి రాగానే ఆ తేడా స్పష్టంగా తెలిసింది" అని రోడ్స్ వివరించాడు. క్రీడలను ప్రోత్సహిస్తూ పిల్లలను బయట ఆడుకోమని చెప్పే తాను, ఢిల్లీ పరిస్థితులు చూసి అయోమయానికి గురయ్యానని తెలిపాడు. "ఢిల్లీలో పిల్లలు బయట చాలా సమయం గడుపుతారు. ఇంతటి విషపూరితమైన గాలిలో అది ఎలా సాధ్యమో నాకు అర్థం కావడం లేదు" అని అన్నాడు.

కాలుష్యం కారణంగా బీసీసీఐ అండర్-23 నాకౌట్ మ్యాచ్‌లను ఢిల్లీ నుంచి ముంబైకి తరలించడం సరైన నిర్ణయమని రోడ్స్ అభిప్రాయపడ్డాడు. చాలా క్రికెట్ అకాడమీలు తమ టూర్‌లను ఢిల్లీకి రద్దు చేసుకొని గోవాకు వస్తున్నాయని, ఇక్కడ మౌలిక సదుపాయాలు తక్కువైనా ఆరోగ్యానికి ప్రాధాన్యమిస్తున్నాయని చెప్పాడు. "ఒక తండ్రిగా, క్రీడాకారుడిగా నేను ఢిల్లీలో నివసించడానికి చాలా ఇబ్బంది పడతాను" అని స్పష్టం చేశాడు.

అదే సమయంలో, ఢిల్లీ ప్రభుత్వం తలపెట్టిన 102 ఎకరాల 'స్పోర్ట్స్ సిటీ' ప్రాజెక్టును రోడ్స్ ప్రశంసించాడు. క్రికెట్‌తో పాటు ఇతర క్రీడలకు కూడా భారత్‌లో ప్రాధాన్యం పెరుగుతోందని, ఇలాంటి స్పోర్ట్స్ సిటీలు యువ ప్రతిభను వెలికితీయడానికి ఎంతగానో ఉపయోగపడతాయని అన్నాడు. "ఒక దక్షిణాఫ్రికా క్రీడాభిమానిగా నాకు కొంచెం ఆందోళనగా ఉంది. ఎందుకంటే ఇలాంటి సౌకర్యాలతో భారత క్రీడాకారులు మరింత రాణిస్తారు" అని వ్యాఖ్యానించాడు.