Vikranth: 'సంతాన ప్రాప్తిరస్తు' చిత్రం నుంచి ఓ హార్ట్ టచింగ్ సాంగ్ విడుదల

యువ హీరో విక్రాంత్, నటి చాందినీ చౌదరి ప్రధాన పాత్రల్లో నటిస్తున్న చిత్రం 'సంతాన ప్రాప్తిరస్తు'. నవంబర్ 14న థియేటర్లలో విడుదల కానున్న ఈ సినిమా నుంచి 'మరి మరి..' అంటూ సాగే ఓ ఎమోషనల్ లిరికల్ సాంగ్‌ను చిత్ర బృందం తాజాగా విడుదల చేసింది. ప్రస్తుతం ఈ పాట సంగీత ప్రియులను ఆకట్టుకుంటూ, సినిమాపై ఆసక్తిని పెంచుతోంది.

ప్రముఖ గాయకుడు హేషమ్ అబ్దుల్ వహాబ్ ఈ పాటను ఎంతో భావోద్వేగంగా ఆలపించారు. సునీల్ కశ్యప్ స్వరపరిచిన ఈ గీతానికి ఉమా వంగూరి సాహిత్యం అందించారు. ప్రాణంగా ప్రేమించిన భార్యతో ఎడబాటు కారణంగా భర్త పడే వేదనను ఈ పాటలో హృద్యంగా చూపించారు. విక్రాంత్ నటన, పాటలోని సాహిత్యం ప్రేక్షకులను కదిలించేలా ఉన్నాయి.

సంజీవ్ రెడ్డి దర్శకత్వం వహిస్తున్న ఈ సినిమాకు షేక్ దావూద్ జి స్క్రీన్ ప్లే అందించారు. మధుర ఎంటర్‌టైన్‌మెంట్, నిర్వి ఆర్ట్స్ బ్యానర్లపై మధుర శ్రీధర్ రెడ్డి, నిర్వి హరిప్రసాద్ రెడ్డి సంయుక్తంగా నిర్మిస్తున్నారు. ఇప్పటికే విడుదలైన టీజర్, పోస్టర్లకు మంచి స్పందన లభించగా, ఇప్పుడు ఈ 'మరి మరి..' పాటతో సినిమా ప్రమోషన్లు మరింత ఊపందుకున్నాయి. ఓ సున్నితమైన అంశాన్ని వినోదాత్మకంగా తెరకెక్కించిన ఈ చిత్రంపై ప్రేక్షకుల్లో మంచి అంచనాలు నెలకొన్నాయి.

లిరిక్ ఇలా సాగుతుంది...

మరి మరి నిన్ను వెతికేలా
మరవదు ఓ క్షణమైనా
మనసంతా నీ తలపులే
ప్రతి చోటా నీ గురుతులే
వేచా గడిచిన నిన్నల్లో
వెతికా నడిచిన దారుల్లో
వెలుగే విడిచిన నీడల్లో
వదిలి వెళ్లిన జాడల్లో 
మరి మరి నిన్ను వెతికేలా...!!