కృష్ణా జిల్లాలో ఘోర ప్రమాదం.. ఒకే గ్రామానికి చెందిన ముగ్గురు యువకుల మృతి

ఉయ్యూరు-మచిలీపట్నం జాతీయ రహదారిపై మంగళవారం ఉదయం జరిగిన ఘోర రోడ్డు ప్రమాదంలో ముగ్గురు యువకులు ప్రాణాలు కోల్పోయారు. మరో యువకుడు తీవ్ర గాయాలతో ఆసుపత్రిలో చికిత్స పొందుతున్నాడు. ఈ ఘటనతో మృతుల కుటుంబాల్లో తీవ్ర విషాదం నెలకొంది.

వివరాల్లోకి వెళితే.. గండిగుంట సమీపంలో వేగంగా వెళుతున్న ఓ కారు అదుపుతప్పి రహదారి పక్కన బోల్తా పడింది. ప్రమాద తీవ్రతకు కారు నుజ్జునుజ్జయ్యింది. ఈ దుర్ఘటనలో ముగ్గురు యువకులు అక్కడికక్కడే దుర్మరణం చెందారు. సమాచారం అందుకున్న పోలీసులు వెంటనే ఘటనాస్థలానికి చేరుకుని సహాయక చర్యలు చేపట్టారు.

మృతులను కుందేరు గ్రామానికి చెందిన చింతయ్య (17), రాకేశ్‌ బాబు (24), ప్రిన్స్ (24)గా గుర్తించారు. తీవ్రంగా గాయపడిన మరో వ్యక్తిని తక్షణమే సమీపంలోని ఆసుపత్రికి తరలించారు. అతివేగం కారణంగానే డ్రైవర్ నియంత్రణ కోల్పోయి ఈ ప్రమాదం జరిగిందని పోలీసులు ప్రాథమికంగా నిర్ధారించారు. స్థానికులు కూడా ఇదే విషయాన్ని చెబుతున్నారు.

ఈ ప్రమాదంతో జాతీయ రహదారిపై కొంతసేపు ట్రాఫిక్‌కు అంతరాయం ఏర్పడింది. పోలీసులు ట్రాఫిక్‌ను క్రమబద్ధీకరించి, వాహనాల రాకపోకలను పునరుద్ధరించారు. మృతదేహాలను పోస్టుమార్టం నిమిత్తం ఉయ్యూరు ప్రభుత్వ ఆసుపత్రికి తరలించారు. ఘటనపై కేసు నమోదు చేసుకుని దర్యాప్తు చేస్తున్నట్లు పోలీసులు తెలిపారు. ఒకే గ్రామానికి చెందిన ముగ్గురు యువకులు మృతి చెందడంతో కుందేరులో విషాదఛాయలు అలముకున్నాయి.