మీరు వాడే మందు అసలైనదా?.. స్కాన్ చేసి తెలుసుకోండిలా!

దేశంలో నానాటికీ పెరుగుతున్న నకిలీ ఔషధాల బెడదకు శాశ్వతంగా అడ్డుకట్ట వేసేందుకు కేంద్ర ప్రభుత్వం కీలకమైన నిర్ణయం తీసుకుంది. ప్రజల ఆరోగ్యాన్ని, ఆర్థిక భద్రతను దృష్టిలో ఉంచుకుని దేశంలో విక్రయించే అన్ని రకాల మందులపై ఇకపై క్యూఆర్ కోడ్ ముద్రించడాన్ని తప్పనిసరి చేసింది. 'ట్రాక్ అండ్ ట్రేస్' పేరుతో అమల్లోకి తెచ్చిన ఈ విధానం ద్వారా వినియోగదారులు తాము కొనుగోలు చేసే మందు అసలైనదో కాదో సులభంగా తెలుసుకునే వీలు కలుగుతుంది.

ఈ కొత్త విధానం ప్రకారం వినియోగదారులు తమ స్మార్ట్‌ఫోన్‌తో మందుల ప్యాకెట్‌పై ఉన్న క్యూఆర్ కోడ్ లేదా బార్‌కోడ్‌ను స్కాన్ చేయాల్సి ఉంటుంది. అలా చేసిన వెంటనే ఆ ఔషధానికి సంబంధించిన పూర్తి వివరాలు ఫోన్ స్క్రీన్‌పై కనిపిస్తాయి. ఇందులో ఔషధం యూనిక్ ప్రొడక్ట్ ఐడెంటిఫికేషన్ కోడ్, జనరిక్ పేరు, తయారీదారు, బ్యాచ్ నంబర్, తయారీ తేదీ, గడువు తేదీ, తయారీ లైసెన్స్ నంబర్ వంటి కీలక సమాచారం ఉంటుంది. ఈ వివరాలు అందుబాటులోకి రావడం వల్ల మందు ప్రామాణికతను నిర్ధారించుకోవచ్చు.

ప్రస్తుతానికి మార్కెట్‌లో ఎక్కువగా అమ్ముడయ్యే సుమారు 300 రకాల ఔషధాలపై ఈ క్యూఆర్ కోడ్ విధానాన్ని ప్రభుత్వం తప్పనిసరి చేసింది. ఈ జాబితాలో అధికంగా వినియోగించే పెయిన్‌కిల్లర్లు, యాంటీబయాటిక్స్, యాంటీ-ఎలర్జిక్ మందులు ఉన్నాయి. రాబోయే రోజుల్లో ఈ నిబంధనను అన్ని ఫార్మా కంపెనీలకు, అన్ని రకాల మందులకు వర్తింపజేయాలని కేంద్రం యోచిస్తోంది.

ఒకవేళ ఔషధం ప్యాకింగ్‌పై క్యూఆర్ కోడ్ లేకపోయినా, లేదా స్కాన్ చేసినప్పుడు సరైన వివరాలు కనిపించకపోయినా దానిని నకిలీ మందుగా అనుమానించే అవకాశం ఉంటుంది. ఈ పారదర్శక విధానం వల్ల కల్తీ మందుల తయారీదారులకు అడ్డుకట్ట పడటమే కాకుండా, వినియోగదారులకు తాము కొంటున్న మందుల నాణ్యతను స్వయంగా తనిఖీ చేసుకునే అధికారం లభిస్తుంది.