పాపం, కిమ్ కర్డాషియాన్... బార్ ఎగ్జామ్ మళ్లీ ఫెయిలైందట!

ప్రముఖ రియాలిటీ టీవీ స్టార్, వ్యాపారవేత్త కిమ్ కర్డాషియాన్ లాయర్ కావాలన్న తన కలను నెరవేర్చుకునే ప్రయత్నంలో మరోసారి విఫలమైంది. కాలిఫోర్నియా బార్ ఎగ్జామ్‌లో ఆమె ఉత్తీర్ణత సాధించలేకపోయింది. అయితే, ఈ ఫలితంతో తాను నిరాశ పడలేదని, న్యాయవాది అయ్యే వరకు తన ప్రయత్నాన్ని ఆపనని స్పష్టం చేసింది. ఇది ఓటమి కాదని, తన పట్టుదలకు మరింత ఇంధనం లాంటిదని సోషల్ మీడియాలో పేర్కొంది.

ఈ ఏడాది జులైలో బార్ పరీక్ష రాసిన కిమ్, దాని ఫలితంపై తాజాగా తన ఇన్‌స్టాగ్రామ్ స్టోరీలో స్పందించింది. "సరే... నేను ఇంకా అడ్వొకేట్ కాలేదు. కేవలం టీవీలో మంచి దుస్తులు వేసుకున్న న్యాయవాదిగా నటిస్తున్నానంతే" అని ఆమె చమత్కరించింది. "ఈ న్యాయవాద ప్రయాణంలో ఆరేళ్లు గడిచాయి. బార్ పరీక్ష పాసయ్యే వరకు నేను వెనక్కి తగ్గేది లేదు. ఎలాంటి షార్ట్‌కట్స్ ఉండవు. మరింత చదువు, మరింత పట్టుదలే నా ముందున్న మార్గం" అని 45 ఏళ్ల కిమ్ వివరించింది.

న్యాయవాది కావాలన్న తన ఆకాంక్షను కిమ్ 2019లో ప్రకటించింది. సంప్రదాయ కాలేజీ విద్యకు బదులుగా, ఆమె ఓ లా ఫర్మ్‌లో అప్రెంటిస్‌గా చేరి న్యాయశాస్త్రం అభ్యసిస్తోంది. గతంలో 'బేబీ బార్'గా పిలిచే ఫస్ట్-ఇయర్ లా స్టూడెంట్స్ ఎగ్జామినేషన్‌ను కూడా ఆమె నాలుగు ప్రయత్నాల్లో పాసైంది. ఈ ఏడాది మల్టీస్టేట్ ప్రొఫెషనల్ రెస్పాన్సిబిలిటీ ఎగ్జామ్‌లోనూ ఆమె ఉత్తీర్ణత సాధించింది.

ఇదిలా ఉండగా, కిమ్ కర్డాషియాన్ ప్రస్తుతం 'ఆల్స్ ఫెయిర్' అనే వెబ్ సిరీస్‌లో నటిస్తోంది. ఇందులో ఆమె ఓ మహిళా న్యాయవాదుల సంస్థలో పనిచేసే లాయర్ పాత్ర పోషిస్తుండటం గమనార్హం. తనకు మద్దతుగా నిలుస్తున్న ప్రతి ఒక్కరికీ ఆమె కృతజ్ఞతలు తెలిపింది. పాస్ అవడానికి చాలా దగ్గరగా వచ్చి విఫలమవడం తనను మరింత ప్రేరేపించిందని, త్వరలోనే విజయం సాధిస్తానని కిమ్ ధీమా వ్యక్తం చేసింది.