స్టేజ్‌పై రోబోతో డ్యాన్స్.. లక్షల కోట్ల ప్యాకేజీపై మస్క్ ఆనందం.. వీడియో వైర‌ల్‌!

ప్రముఖ ఎలక్ట్రిక్ కార్ల తయారీ సంస్థ టెస్లాలో చీఫ్ ఎగ్జిక్యూటివ్ ఆఫీసర్ (సీఈఓ) ఎలాన్ మస్క్‌కు భారీ ఊరట లభించింది. ఆయనకు రికార్డు స్థాయిలో సుమారు 1 ట్రిలియన్ డాలర్ల వేతన ప్యాకేజీని ఇచ్చేందుకు కంపెనీ వాటాదారులు ఆమోదం తెలిపారు. టెక్సాస్‌లోని ఆస్టిన్‌లో గురువారం జరిగిన టెస్లా వార్షిక సర్వసభ్య సమావేశంలో ఈ కీలక నిర్ణయం తీసుకున్నారు.

ఈ ఓటింగ్‌లో 75 శాతానికి పైగా ఇన్వెస్టర్లు మస్క్ ప్యాకేజీకి మద్దతుగా నిలిచారు. ఈ ప్రణాళిక ప్రకారం ఎలాన్ మస్క్ కొన్ని ప్రతిష్ఠాత్మక లక్ష్యాలను చేరుకుంటే, ప్రపంచంలోనే తొలి ట్రిలియనీర్‌గా అవతరించే అవకాశం ఉంది. ప్రస్తుతం 1.5 ట్రిలియన్ డాలర్లుగా ఉన్న టెస్లా మార్కెట్ విలువను 8.5 ట్రిలియన్ డాలర్లకు పెంచడం వంటివి ఈ లక్ష్యాల్లో ఉన్నాయి. ఈ ప్రకటన వెలువడిన తర్వాత ఆఫ్టర్-అవర్స్ ట్రేడింగ్‌లో టెస్లా షేర్లు దాదాపు 1 శాతం పెరిగాయని రాయిటర్స్ వార్తా సంస్థ నివేదించింది.

ఓటింగ్ ఫలితాలు వెలువడిన వెంటనే ఎలాన్ మస్క్ చిరునవ్వుతో వేదికపైకి వచ్చి, టెస్లా హ్యూమనాయిడ్ రోబో ‘ఆప్టిమస్’తో కలిసి డ్యాన్స్ చేసి తన ఆనందాన్ని పంచుకున్నారు. ఈ సందర్భంగా ఆయన మాట్లాడుతూ, "వాటాదారుల ఓట్లకు మద్దతు ఇచ్చిన ప్రతి ఒక్కరికీ నా హృదయపూర్వక ధన్యవాదాలు. మీకు నా అభినంద‌న‌లు" అని తెలిపారు. "ఇతర కంపెనీల సమావేశాలు బోరింగ్‌గా ఉంటాయి. కానీ మనవి మాత్రం అద్భుతంగా ఉంటాయి. ఇది చూడండి.. ఇది అమోఘం" అని వ్యాఖ్యానించారు. ఈ ఆమోదాన్ని టెస్లాకు ఒక కొత్త అధ్యాయంగా ఆయ‌న అభివర్ణించారు.

ఈ ఒప్పందం ప్రకారం రాబోయే పదేళ్లలో మస్క్ నిర్దేశిత లక్ష్యాలను సాధిస్తే టెస్లాలో అదనంగా 12 శాతం వాటాను పొందుతారు. వాటిలో కొన్ని ముఖ్యమైనవి:
* ఏటా 20 మిలియన్ల వాహనాలను డెలివరీ చేయడం.
* 10 లక్షల రోబోట్యాక్సీలను రోడ్లపైకి తీసుకురావడం.
* 10 లక్షల హ్యూమనాయిడ్ రోబోలను విక్రయించడం.
* ఏడాదికి 400 బిలియన్ డాలర్ల లాభాన్ని ఆర్జించడం.

అయితే, ఈ ప్యాకేజీని నార్వే సావరిన్ వెల్త్ ఫండ్ వంటి కొన్ని పెద్ద సంస్థాగత పెట్టుబడి సంస్థలు తీవ్రంగా వ్యతిరేకించాయి. ఇది ఎగ్జిక్యూటివ్‌కు ఇచ్చే అత్యధిక వేతనమని వాదించాయి. మరోవైపు టెస్లా బోర్డు ఈ ప్యాకేజీని సమర్థించింది. కంపెనీ ఆవిష్కరణలు, విస్తరణకు మస్క్ నాయకత్వం చాలా అవసరమని, ఒకవేళ ఈ ప్యాకేజీని తిరస్కరిస్తే ఆయన కంపెనీ నుంచి వైదొలగే ప్రమాదం ఉందని హెచ్చరించింది.