Nvidia: ఎన్విడియా ఎంత పెద్దదంటే.. టెక్ దిగ్గజాలన్నీ కలిపినా తక్కువే!

టెక్నాలజీ ప్రపంచంలో సరికొత్త చరిత్ర సృష్టించింది చిప్ మేకర్ దిగ్గజం ఎన్విడియా.  కంపెనీ మార్కెట్ విలువ 5 ట్రిలియన్ డాలర్ల మైలురాయిని దాటింది. ఈ ఘనత సాధించిన ప్రపంచంలోనే తొలి కంపెనీగా రికార్డు సృష్టించింది. ఇప్పటివరకు మార్కెట్‌లో అగ్రగాములుగా ఉన్న యాపిల్, మైక్రోసాఫ్ట్ వంటి సంస్థలను కూడా ఎన్విడియా వెనక్కి నెట్టింది. ఆర్టిఫిషియల్ ఇంటెలిజెన్స్ (ఏఐ) రంగంలో ఏర్పడిన 'గోల్డ్ రష్' కారణంగా, జనవరి 2023 నుంచి కంపెనీ షేర్ల విలువ ఏకంగా 1,300 శాతానికి పైగా పెరిగింది.

5 ట్రిలియన్ డాలర్లు అనే సంఖ్య ఎంత పెద్దదో అర్థం చేసుకోవడానికి కొన్ని పోలికలు చూస్తే ఆశ్చర్యం కలుగుతుంది. కేవలం యాపిల్, మైక్రోసాఫ్ట్‌లను దాటడమే కాదు, టెక్ ప్రపంచంలోని మరో రెండు పవర్‌హౌస్‌లైన ఆల్ఫాబెట్ (గూగుల్), మెటా (ఫేస్‌బుక్) కంపెనీల మొత్తం విలువను కలిపినా ఎన్విడియా మార్కెట్ క్యాప్ కంటే తక్కువే. అంతేకాదు, ప్రపంచంలోని మూడు అతిపెద్ద రిటైల్ సంస్థలైన అమెజాన్, వాల్‌మార్ట్, కాస్ట్‌కోల ఉమ్మడి విలువ కంటే కూడా ఎన్విడియా విలువే ఎక్కువ.

మరోవైపు టెస్లా, జనరల్ మోటార్స్, ఫోర్డ్, స్టెల్లాంటిస్ వంటి ఆటోమొబైల్ దిగ్గజాల మొత్తం మార్కెట్ విలువ 1.7 ట్రిలియన్ డాలర్లు మాత్రమే. నెట్‌ఫ్లిక్స్, డిస్నీ, కామ్‌కాస్ట్ వంటి మీడియా సంస్థలన్నీ కలిపినా ట్రిలియన్ డాలర్ల మార్క్‌ను కూడా చేరలేవు. ప్రపంచవ్యాప్తంగా ప్రతి ఇంటా తెలిసిన కోకా-కోలా, మెక్‌డొనాల్డ్స్, స్టార్‌బక్స్ వంటి బ్రాండ్ల ఉమ్మడి విలువ సైతం ఎన్విడియా విలువలో 15 శాతం కూడా లేదు.

ఎన్విడియా భవిష్యత్ సామర్థ్యంపై వాల్ స్ట్రీట్ ఎంతటి నమ్మకంతో ఉందో ఈ గణాంకాలు స్పష్టం చేస్తున్నాయి. అయితే, కొందరు విశ్లేషకులు మాత్రం ఈ అనూహ్య పెరుగుదలను అనుమానంగా చూస్తున్నారు. ఇది 'డాట్-కామ్ బబుల్' లాంటి ఏఐ బబుల్ కావచ్చని, ఎప్పుడైనా పేలిపోయే ప్రమాదం ఉందని హెచ్చరిస్తున్నారు. మరోవైపు, కంపెనీ మద్దతుదారులు మాత్రం రాబోయే ఏఐ స్వర్ణయుగంలో ఎన్విడియా గుండెకాయలా నిలుస్తుందని ధీమా వ్యక్తం చేస్తున్నారు. మే 2023లో కేవలం 750 బిలియన్ డాలర్ల వద్ద ఉన్న కంపెనీ విలువ, ఇప్పుడు కళ్లు చెదిరే వేగంతో 5 ట్రిలియన్ డాలర్లకు చేరడం దాని ప్రస్థానానికి నిదర్శనం. చివరికి ఎవరి వాదన సరైనదో కాలమే నిర్ణయించాలి.