Harmanpreet Kaur: వరల్డ్ కప్ గెలిచిన భారత మహిళలు... అనుష్క శర్మ సినిమా రిలీజ్ కు ఇదే సమయం అంటున్న నెటిజన్లు!

భారత మహిళా క్రికెట్ జట్టు చరిత్ర సృష్టించింది. హర్మన్‌ప్రీత్ కౌర్ సారథ్యంలోని జట్టు తొలిసారిగా వన్డే ప్రపంచకప్‌ను కైవసం చేసుకుంది. ఆదివారం జరిగిన ఉత్కంఠభరిత ఫైనల్ మ్యాచ్‌లో దక్షిణాఫ్రికాను 52 పరుగుల తేడాతో ఓడించి విశ్వవిజేతగా నిలిచింది. ఈ చారిత్రక విజయంపై ప్రశంసలు వెల్లువెత్తుతుండగా, సోషల్ మీడియాలో మరో ఆసక్తికర అంశం ట్రెండ్ అవుతోంది.

అదే మాజీ కెప్టెన్, లెజెండరీ బౌలర్ జులన్ గోస్వామి జీవితం ఆధారంగా తెరకెక్కుతున్న చిత్రం ‘చక్‌దా ఎక్స్‌ప్రెస్’. ఈ సినిమాలో బాలీవుడ్ నటి అనుష్క శర్మ ప్రధాన పాత్రలో నటిస్తున్నారు. భారత మహిళల జట్టు ప్రపంచకప్ గెలవడంతో, ఈ సినిమాను వీలైనంత త్వరగా విడుదల చేయాలనే డిమాండ్ నెటిజన్ల నుంచి బలంగా వినిపిస్తోంది. ఈ విజయం స్ఫూర్తితో జులన్ జీవిత కథను తెరపై చూస్తే బాగుంటుందని వారు అభిప్రాయపడుతున్నారు.

నిజానికి ఈ సినిమా ప్రకటన వెలువడి రెండేళ్లు దాటింది. ప్రముఖ ఓటీటీ వేదిక నెట్‌ఫ్లిక్స్‌లో విడుదల చేయనున్నట్లు చెబుతూ ఒక టీజర్‌ను కూడా విడుదల చేశారు. అయితే, ఆ తర్వాత సినిమా పురోగతిపై ఎలాంటి అధికారిక సమాచారం లేదు. దీంతో, ఇప్పుడు మహిళల జట్టు సాధించిన ఈ అద్భుతమైన విజయమే ‘చక్‌దా ఎక్స్‌ప్రెస్’ విడుదలకు సరైన సమయమని అభిమానులు భావిస్తున్నారు. ప్రొసిత్ రాయ్ దర్శకత్వం వహిస్తున్న ఈ చిత్రాన్ని కర్నేష్ శర్మ నిర్మిస్తున్నారు.