ఈ అద్భుత విజయం భారత క్రికెట్ చరిత్ర సువర్ణాధ్యాయంగా నిలిచిపోతుంది: మహిళా జట్టుకు అభినందనలు తెలిపిన వైఎస్ జగన్

భారత మహిళా క్రికెట్ జట్టు ప్రపంచ కప్ గెలిచి చరిత్ర సృష్టించడంపై వైసీపీ అధినేత వైఎస్ జగన్ మోహన్ రెడ్డి హర్షం వ్యక్తం చేశారు. టీమిండియా సాధించిన ఈ అద్భుత విజయంపై ఆయన ట్విట్టర్ వేదికగా అభినందనలు తెలిపారు. ఈ చారిత్రక విజయం భారత క్రికెట్ చరిత్రలో ఒక సువర్ణాధ్యాయంగా నిలిచిపోతుందని కొనియాడారు.

సోమవారం ఆయన ట్విట్టర్‌లో స్పందిస్తూ.. "భారత మహిళా క్రికెట్ జట్టు చరిత్ర సృష్టించింది. వారి అద్భుతమైన టీమ్‌వర్క్, అచంచలమైన ఆత్మవిశ్వాసం దేశం గర్వపడేలా చేశాయి. ఈ విజయంతో వారు వరల్డ్ కప్‌ను అందుకున్నారు" అని పేర్కొన్నారు. క్రీడాకారిణుల ప్రతిభను, వారి కృషిని జగన్ ప్రత్యేకంగా ప్రశంసించారు.

ఈ విజేత జట్టులో ఆంధ్రప్రదేశ్‌లోని కడపకు చెందిన అమ్మాయి శ్రీచరణి భాగం కావడం ఎంతో విశేషమని జగన్ అన్నారు. ఈ చారిత్రక విజయం ప్రతి భారతీయుడు గొప్ప కలలు కనడానికి, వాటిని సాకారం చేసుకోవడానికి ఒక ప్రేరణగా నిలుస్తుందని ఆయన తన సందేశంలో వివరించారు. ఈ మేరకు విజేత జట్టుకు ఆయన శుభాకాంక్షలు తెలిపారు.