కేంద్రం సంచలన నిర్ణయం.. హైవేలపై ప్రమాదాలు జరిగితే కాంట్రాక్టర్లకు భారీ ఫైన్!

దేశంలో రోడ్డు ప్రమాదాలు, మరణాల సంఖ్యను తగ్గించే లక్ష్యంతో కేంద్ర ప్రభుత్వం ఒక కీలకమైన నిర్ణయం తీసుకుంది. బీవోటీ (BOT) పద్ధతిలో నిర్మించిన జాతీయ రహదారులపై ఒకే ప్రాంతంలో పదేపదే ప్రమాదాలు జరిగితే, సంబంధిత కాంట్రాక్టర్‌కు భారీ జరిమానా విధించనుంది. రహదారుల నిర్మాణంలో నాణ్యత, భద్రతా ప్రమాణాల విషయంలో కాంట్రాక్టర్లకు కూడా బాధ్యత అప్పగించడమే ఈ నిర్ణయం ముఖ్య ఉద్దేశం.

కేంద్ర రోడ్డు రవాణా, రహదారుల శాఖ కార్యదర్శి వి. ఉమాశంకర్ ఆదివారం ఈ వివరాలను వెల్లడించారు. జాతీయ రహదారిపై 500 మీటర్ల పరిధిలో ఒకే ఏడాదిలో ఒకటి కంటే ఎక్కువ ప్రమాదాలు నమోదైతే, ఆ కాంట్రాక్టర్‌పై రూ. 25 లక్షల జరిమానా విధిస్తారని తెలిపారు. మరుసటి ఏడాది కూడా అదే ప్రాంతంలో ప్రమాదాలు పునరావృతమైతే, ఈ జరిమానాను రూ. 50 లక్షలకు పెంచుతామని స్పష్టం చేశారు. ఇందుకోసం ఇప్పటికే బీవోటీ ఒప్పంద పత్రంలో అవసరమైన సవరణలు చేసినట్లు ఆయన పేర్కొన్నారు.

దేశవ్యాప్తంగా ప్రమాదాలు ఎక్కువగా జరిగే 3,500 ప్రాంతాలను (యాక్సిడెంట్ స్ట్రెచ్‌లు) గుర్తించామని, వాటిపై ప్రత్యేకంగా దృష్టి సారించనున్నట్లు ఉమాశంకర్ తెలిపారు. ఈ కొత్త నిబంధన ద్వారా రహదారుల నిర్వహణను కాంట్రాక్టర్లు మరింత బాధ్యతాయుతంగా చూసుకుంటారని ప్రభుత్వం ఆశిస్తోంది.

ఇదే సమయంలో రోడ్డు ప్రమాద బాధితులకు అండగా నిలిచేందుకు మరో కీలక పథకానికి కేంద్రం శ్రీకారం చుడుతోందని ఆయన వెల్లడించారు. ప్రమాద బాధితులకు ఆసుపత్రుల్లో నగదు రహిత (క్యాష్‌లెస్) వైద్యం అందించే పథకాన్ని కూడా ప్రభుత్వం త్వరలోనే ప్రారంభించనుందని తెలిపారు. సాధారణంగా జాతీయ రహదారుల నిర్మాణాలను బీవోటీతో పాటు హైబ్రిడ్ యాన్యుటీ మోడల్ (HAM), ఇంజనీరింగ్ ప్రొక్యూర్‌మెంట్ అండ్ కన్‌స్ట్రక్షన్ (EPC) పద్ధతుల్లో చేపడతారు. వీటిలో బీవోటీ ప్రాజెక్టుల నిర్వహణ బాధ్యత 15 నుంచి 20 ఏళ్ల వరకు కాంట్రాక్టర్లకే ఉంటుంది.