Himanshu Shukla: సంగం బ్యారేజీకి తప్పిన పెను ప్రమాదం

శ్రీ పొట్టి శ్రీరాములు నెల్లూరు జిల్లాలోని సంగం పెన్నా నది బ్యారేజీ వద్ద పెను ప్రమాదం త్రుటిలో తప్పింది. వరద ఉద్ధృతికి తాళ్లు తెంచుకుని కొట్టుకు వచ్చిన మూడు ఇసుక పడవలు బ్యారేజీ వైపు దూసుకురావడంతో తీవ్ర ఉత్కంఠ నెలకొంది. అధికారులు సకాలంలో స్పందించి వాటిని నియంత్రించడంతో పెను విధ్వంసం జరగకుండా నివారించారు.

వివరాల్లోకి వెళితే.. బీరాపేరు, బొగ్గేరు వాగుల నుంచి భారీగా వరద నీరు వచ్చి చేరడంతో పెన్నా నదిలో ప్రవాహం ఒక్కసారిగా పెరిగింది. దీంతో బుధవారం నాటికి సంగం బ్యారేజీ వద్ద నీటిమట్టం 11 అడుగులకు చేరుకుంది. వరద తాకిడికి వంతెన రెయిలింగ్‌కు కట్టి ఉంచిన ఇసుక పడవల తాళ్లు తెగిపోయాయి. నియంత్రణ కోల్పోయిన మూడు పడవలు వేగంగా బ్యారేజీ వైపు కొట్టుకురావడం మొదలుపెట్టాయి.

ఈ పరిణామాన్ని గమనించిన అధికారులు వెంటనే అప్రమత్తమై సహాయక చర్యలు చేపట్టారు. రెండు పడవలను విజయవంతంగా అదుపులోకి తెచ్చారు. వాటిలో ఒకదాన్ని ఇసుక రేవు వద్దకు, మరొకదాన్ని కనిగిరి జలాశయం ప్రధాన రెగ్యులేటర్ వద్దకు సురక్షితంగా చేర్చారు. అయితే, మూడో పడవ బ్యారేజీకి సుమారు 400 మీటర్ల ఎగువన పాత ఆనకట్ట క్రెస్ట్ వద్ద ఇరుక్కుపోయింది.

సమాచారం అందుకున్న జిల్లా కలెక్టర్ హిమాంశు శుక్లా, ఎస్పీ అజిత వేజెండ్ల ఘటనా స్థలానికి చేరుకుని పరిస్థితిని సమీక్షించారు. సరైన సమయంలో యంత్రాంగం స్పందించకుంటే ఈ పడవలు బ్యారేజీ గేట్లను ఢీకొని ఉంటే భారీ నష్టం వాటిల్లేదని స్థానికులు ఆందోళన వ్యక్తం చేశారు.