‘కె-ర్యాంప్’ ప్రమోషన్స్... విశాఖలో కిరణ్ అబ్బవరం హంగామా

యంగ్ హీరో కిరణ్ అబ్బవరం తన కొత్త చిత్రం ‘కె-ర్యాంప్’ ప్రమోషన్లలో వేగం పెంచారు. సినిమా విడుదల తేదీ దగ్గరపడుతుండటంతో చిత్ర బృందం ప్రచార కార్యక్రమాలను ముమ్మరం చేసింది. ఇందులో భాగంగా హీరో కిరణ్ అబ్బవరం మంగళవారం విశాఖపట్నంలో సందడి చేశారు. నగరంలోని ఓ విద్యాసంస్థలో ఏర్పాటు చేసిన కార్యక్రమంలో పాల్గొని విద్యార్థులలో ఉత్సాహం నింపారు. ఆయన రాకతో అక్కడి యువత పెద్ద ఎత్తున కేరింతలు కొడుతూ ఘన స్వాగతం పలికింది.

ఈ పర్యటనలో భాగంగా కిరణ్ మీడియా సమావేశంలో కూడా పాల్గొన్నారు. తన సినిమా విశేషాలను పంచుకుంటూ, అక్టోబర్ 18న థియేటర్లలో కలుద్దామంటూ వైజాగ్ ప్రేక్షకులకు ధన్యవాదాలు తెలిపారు. ఆయన ప్రముఖ పుణ్యక్షేత్రమైన అన్నవరం వెళ్లి శ్రీ సత్యనారాయణ స్వామి వారిని దర్శించుకున్నారు. స్వామివారికి ప్రత్యేక పూజలు చేసి ఆశీస్సులు అందుకున్నారు. ఒకే రోజు ప్రచార కార్యక్రమాలు, దైవ దర్శనంతో కిరణ్ బిజీబిజీగా గడిపారు.

జైన్స్ నాని దర్శకత్వంలో తెరకెక్కుతున్న ‘కె-ర్యాంప్’ చిత్రంలో కిరణ్ అబ్బవరం సరసన యుక్తి తరేజా హీరోయిన్‌గా నటిస్తున్నారు. ఈ చిత్రాన్ని దీపావళి కానుకగా అక్టోబర్ 18న ప్రేక్షకుల ముందుకు తీసుకురానున్నారు.