2 కిలోమీటర్లకు 45 నిమిషాలు.. ముంబై ట్రాఫిక్‌పై ప్రముఖ కంపెనీ సీఈవో అసహనం!

దేశ ఆర్థిక రాజధాని ముంబైలో ట్రాఫిక్ కష్టాలు ఏ స్థాయిలో ఉన్నాయో చెప్పడానికి ఇది మరో ఉదాహరణ. సామాన్యులే కాదు, కార్పొరేట్ సంస్థల అధినేతలు కూడా ఈ ట్రాఫిక్ నరకాన్ని అనుభవిస్తున్నారు. కేవలం రెండు కిలోమీటర్ల దూరం ప్రయాణించడానికి ఏకంగా 45 నిమిషాలు పడుతోందంటూ ఎడెల్‌వైస్ మ్యూచువల్ ఫండ్ సీఈఓ రాధికా గుప్తా సోషల్ మీడియా వేదికగా తన అసహనాన్ని వ్యక్తం చేశారు.

ముంబైలోని వన్ బీకేసీ జంక్షన్ వద్ద ఉన్న ట్రాఫిక్ సమస్యపై నీలేశ్ షా అనే నెటిజన్ 'ఎక్స్' (ట్విట్టర్)లో ఒక పోస్ట్ చేశారు. "వన్ బీకేసీ జంక్షన్ సిగ్నల్ వద్ద ఒక రికార్డు. రెడ్ సిగ్నల్ గ్రీన్‌గా మారడానికి ఎనిమిది నిమిషాలు పడుతోంది. ట్రాఫిక్ వార్డెన్ వాహనాలను ఇష్టానుసారంగా వదిలేస్తూ జంక్షన్‌ను బ్లాక్ చేస్తున్నారు" అని ఆయన ఆరోపించారు. మధ్యప్రాచ్యంలో మాదిరిగా జంక్షన్‌ను బ్లాక్ చేసేవారికి జరిమానా విధించాలని ఆయన సూచించారు.

నీలేశ్ షా పోస్ట్‌కు రాధికా గుప్తా స్పందిస్తూ తన అనుభవాన్ని పంచుకున్నారు. "పరేల్ నుంచి లోయర్ పరేల్‌కు కేవలం 2 కిలోమీటర్ల దూరం ప్రయాణించడానికి కనీసం 45 నిమిషాలు పడుతోంది. ఎల్ఫిన్‌స్టోన్ వంతెన మూసివేసిన కారణంగా అనేక రోడ్లను వన్-వేగా మార్చి, నో-పార్కింగ్ జోన్లుగా ప్రకటించారు. కానీ ఆ నిబంధనలను ఎవరూ పాటించడం లేదు, అధికారులు కూడా పట్టించుకోవడం లేదు. అక్రమ క్రాసింగ్‌లు, అనధికార పార్కింగ్‌ల వంటి రోడ్డు నిబంధనలను కఠినంగా అమలు చేయాలి" అని ఆమె తన పోస్ట్‌లో పేర్కొన్నారు.

ఈ పోస్టులతో ముంబై ట్రాఫిక్ సమస్య మరోసారి చర్చనీయాంశంగా మారింది. పలువురు నెటిజన్లు తమ ఇబ్బందులను కామెంట్ల రూపంలో తెలియజేశారు. ఈ వ్యవహారంపై ముంబై ట్రాఫిక్ పోలీసులు కూడా స్పందించారు. "ఈ విషయాన్ని సంబంధిత ట్రాఫిక్ డివిజన్ దృష్టికి తీసుకెళ్లాం. అవసరమైన చర్యలు తీసుకుంటాం" అని వారు బదులిచ్చారు.