Sana Satish Babu: శ్రీలంక చెర నుంచి కాకినాడ మత్స్యకారుల విడుదల.. ఎంపీ సతీష్ బాబు చొరవతో సురక్షితంగా స్వదేశానికి!
- 52 రోజులుగా శ్రీలంక జైలులో చిక్కుకున్న కాకినాడ మత్స్యకారుల విడుదల
- పొరపాటున శ్రీలంక జలాల్లోకి ప్రవేశించడంతో ఆగస్టు 4న అరెస్ట్
- విడుదల ప్రక్రియలో జాప్యం.. రంగంలోకి దిగిన ఎంపీ సానా సతీష్ బాబు
- ఢిల్లీ స్థాయిలో అధికారుల వేగవంతమైన చర్యలతో ఫలించిన ప్రయత్నాలు
- నేడు సాయంత్రం రామేశ్వరం వద్ద భారత కోస్ట్ గార్డ్కు అప్పగింత
- స్వస్థలాలకు జాలర్లు.. వారి కుటుంబాల్లో వెల్లివిరిసిన ఆనందం
యాభై రెండు రోజుల సుదీర్ఘ నిరీక్షణ, ఆందోళనల తర్వాత శ్రీలంక జైలులో నిర్బంధంలో ఉన్న కాకినాడకు చెందిన నలుగురు మత్స్యకారులు ఎట్టకేలకు విముక్తి పొందారు. టీడీపీ రాజ్యసభ సభ్యుడు సానా సతీష్ బాబు చేసిన ప్రత్యేక చొరవ, ఢిల్లీ స్థాయిలో ఆయన జరిపిన సమన్వయం ఫలించడంతో వారు శుక్రవారం (సెప్టెంబర్ 26) సురక్షితంగా స్వదేశానికి తిరిగి రానున్నారు. ఈ వార్త తెలియడంతో వారి కుటుంబాల్లో ఆనందోత్సాహాలు వెల్లివిరిశాయి.
అసలేం జరిగింది?
కాకినాడకు చెందిన కె. శ్రీను వెంకటేశ్వర్, కరినోకరాజ్ బొర్రియా, చందా నాగేశ్వరరావు, బ్రన్మంథం అనే నలుగురు మత్స్యకారులు కొత్తగా ఫిషింగ్ ట్రాలర్ కొనుగోలు చేసేందుకు తమిళనాడులోని నాగపట్నం వెళ్లారు. అక్కడ పనులు ముగించుకుని తిరిగి వస్తుండగా, నావిగేషన్లో తలెత్తిన సాంకేతిక లోపం కారణంగా పొరపాటున శ్రీలంక సముద్ర జలాల్లోకి ప్రవేశించారు. దీంతో ఆగస్టు 4న శ్రీలంక నావికాదళం వారిని అదుపులోకి తీసుకుని, జాఫ్నా జైలుకు తరలించింది. అప్పటి నుంచి గత 52 రోజులుగా వారు అక్కడే నిర్బంధంలో ఉన్నారు.
నిలిచిపోయిన విడుదల ప్రక్రియ
మత్స్యకారులను విడిపించేందుకు భారత కాన్సులేట్ అధికారి రాజీవ్ నేతృత్వంలో శ్రీలంక ప్రభుత్వంతో పలు దఫాలుగా చర్చలు జరిగాయి. వారి ప్రయత్నాలు ఫలించి, సెప్టెంబర్ 25న జాలర్లను భారత్కు తరలించాలని నిర్ణయించారు. అయితే, భారత ఏజెన్సీలతో సమన్వయ లోపం, కొన్ని విధానపరమైన అడ్డంకుల కారణంగా ఆఖరి నిమిషంలో విడుదల ప్రక్రియ నిలిచిపోయింది. దీంతో వారి కుటుంబాల్లో తీవ్ర నిరాశ అలుముకుంది.
రంగంలోకి దిగిన ఎంపీ సానా సతీష్ బాబు
ఈ క్లిష్ట పరిస్థితుల్లో, ఆంధ్రప్రదేశ్ ముఖ్యమంత్రి ఆదేశాల మేరకు రాజ్యసభ ఎంపీ సానా సతీష్ బాబు తక్షణమే రంగంలోకి దిగారు. ఆయన ఈ విషయాన్ని న్యూఢిల్లీలోని ఆంధ్రప్రదేశ్ భవన్ కమిషనర్ డాక్టర్ అర్జా శ్రీకాంత్ దృష్టికి తీసుకెళ్లారు. వెంటనే స్పందించిన డాక్టర్ శ్రీకాంత్, స్వయంగా ఇండియన్ కోస్ట్ గార్డ్ ప్రధాన కార్యాలయానికి వెళ్లి ప్రిన్సిపల్ డైరెక్టర్ (ఆపరేషన్స్) పంకజ్ వర్మతో సమావేశమయ్యారు. మత్స్యకారుల విడుదలకు తక్షణ చర్యలు చేపట్టాలని కోరారు.
దీంతో కోస్ట్ గార్డ్ అధికారులు వేగంగా స్పందించారు. పంకజ్ వర్మ... శ్రీలంక కోస్ట్ గార్డ్ కమాండర్ దినేష్ జేతో సమన్వయం చేసుకుని విడుదల ప్రక్రియను వేగవంతం చేశారు. కోర్టు నుంచి అవసరమైన అనుమతులు రాగానే, శుక్రవారం మధ్యాహ్నం 2 గంటలకు జాలర్లను జాఫ్నా జైలు నుంచి విడుదల చేశారు. అనంతరం వారిని అంతర్జాతీయ సముద్ర సరిహద్దు రేఖ (IMBL) వరకు తీసుకువచ్చి, సాయంత్రం 6 గంటల సమయంలో రామేశ్వరంలోని మండపం బేస్ సమీపంలో ఇండియన్ కోస్ట్ గార్డ్కు అధికారికంగా అప్పగించనున్నారు. అక్కడి నుంచి వారు తమ స్వస్థలమైన కాకినాడకు బయలుదేరనున్నారు.
నిలిచిపోయిన విడుదల ప్రక్రియను కేవలం ఒక్క రోజులోనే పునరుద్ధరించి, మత్స్యకారులను సురక్షితంగా స్వదేశానికి తీసుకురావడంలో ఎంపీ సానా సతీష్ బాబు పోషించిన కీలక పాత్రపై సర్వత్రా హర్షం వ్యక్తమవుతోంది.
