సినీ నటి రాధిక ఇంట్లో విషాదం.. తల్లి కన్నుమూత

ప్రముఖ సినీ నటి రాధిక శరత్ కుమార్ కుటుంబంలో విషాదం చోటుచేసుకుంది. ఆమె మాతృమూర్తి గీత (86) అనారోగ్యంతో కన్నుమూశారు. కొంతకాలంగా అనారోగ్య సమస్యలతో బాధపడుతున్న ఆమె, నిన్న అర్ధరాత్రి తుదిశ్వాస విడిచినట్లు కుటుంబ సభ్యులు వెల్లడించారు.

గీత, తమిళ చిత్రసీమలో తన విలక్షణ నటనతో చెరగని ముద్ర వేసిన దివంగత నటుడు ఎం.ఆర్. రాధ అర్ధాంగి. తన జీవితాన్ని కుటుంబానికే అంకితం చేసిన ఆమె, తన పిల్లల ఉన్నతికి ఎంతగానో పాటుపడ్డారు. ఆమె మరణవార్త తెలియగానే చిత్ర పరిశ్రమలో విషాద ఛాయలు అలముకున్నాయి.

గీత అంత్యక్రియలను ఈ సాయంత్రం చెన్నైలోని బేసెంట్ నగర్ శ్మశానవాటికలో నిర్వహించనున్నట్లు కుటుంబ వర్గాలు తెలిపాయి. ఈ వార్త తెలిసిన పలువురు సినీ ప్రముఖులు, అభిమానులు సోషల్ మీడియా వేదికగా రాధిక కుటుంబానికి తమ ప్రగాఢ సానుభూతిని వ్యక్తం చేస్తున్నారు.