బోధన్‌లో ఉగ్ర కలకలం.. విద్యార్థిని అదుపులోకి తీసుకున్న ఢిల్లీ పోలీసులు

నిజామాబాద్ జిల్లా బోధన్ పట్టణంలో ఒక్కసారిగా కలకలం రేగింది. ఉగ్రవాద కార్యకలాపాలతో సంబంధాలున్నాయన్న పక్కా సమాచారంతో ఢిల్లీ నుంచి వచ్చిన స్పెషల్ సెల్ పోలీసులు బుధవారం ఆకస్మిక తనిఖీలు చేపట్టారు. ఈ ఆపరేషన్‌లో భాగంగా నిజామాబాద్ నగరంలో బీ-ఫార్మసీ చదువుతున్న ఓ యువకుడిని అదుపులోకి తీసుకున్నారు. ఈ ఘటనతో స్థానిక ప్రజలు విస్మయానికి గురయ్యారు.

ఇటీవల ఝార్ఖండ్‌లోని రాంచీలో బాంబు దాడులకు కుట్ర పన్నుతున్నాడన్న ఆరోపణలపై డానిశ్‌ అనే ఉగ్రవాదిని పోలీసులు అరెస్ట్ చేశారు. అతడిని విచారించిన క్రమంలో బోధన్‌కు చెందిన ఈ యువకుడి పేరు బయటకు వచ్చినట్లు అధికారులు గుర్తించారు. డానిశ్‌ నిర్వహిస్తున్న ఓ ప్రత్యేక సోషల్ మీడియా యాప్‌లో ఈ యువకుడు కూడా చురుగ్గా ఉన్నట్లు ఢిల్లీ స్పెషల్ సెల్ పోలీసులు కనుగొన్నారు. సదరు యాప్ ద్వారా ఆయుధాలు, మందుగుండు సామగ్రి తయారీ వంటి అంశాలపై యువతకు శిక్షణ ఇస్తున్నట్లు పోలీసుల దర్యాప్తులో తేలింది.

పక్కా ఆధారాలు లభించడంతోనే పోలీసులు అతడిని అరెస్ట్ చేశారు. యువకుడి వద్ద నుంచి ఒక ఎయిర్ పిస్టల్, కొన్ని బుల్లెట్లను కూడా స్వాధీనం చేసుకున్నట్లు సమాచారం. అదుపులోకి తీసుకున్న యువకుడిని సమీపంలోని ఎడపల్లి పోలీస్ స్టేషన్‌లో సుమారు నాలుగు గంటల పాటు విచారించారు. అనంతరం కోర్టులో హాజరుపరిచి, కస్టడీకి తీసుకుని ఢిల్లీకి తరలించారు. ఈ కేసులో భాగంగా మహారాష్ట్ర, ఛత్తీస్‌గఢ్‌లలో కూడా మరికొందరిని అదుపులోకి తీసుకున్నట్లు తెలిసింది.

అయితే, ఈ ఆరోపణలను యువకుడి కుటుంబ సభ్యులు ఖండించారు. తమ సోదరుడు ఓ వెబ్‌సైట్‌లో వీడియో కాల్స్ మాట్లాడేవాడని, అంతేకానీ ఉగ్రవాదులతో అతనికి ఎలాంటి సంబంధం లేదని యువకుడి అన్న మీడియాకు తెలిపారు.

బోధన్ ప్రాంతంలో ఉగ్రవాద కార్యకలాపాల నీడలు పడటం ఇది మొదటిసారి కాదు. గతంలో కూడా ఎన్‌ఐఏ, ఐబీ వంటి కేంద్ర దర్యాప్తు సంస్థలు ఇక్కడ పలుమార్లు తనిఖీలు చేశాయి. 2021లో బంగ్లాదేశీయులు నకిలీ చిరునామాలతో పాస్‌పోర్టులు పొందిన ఘటన దేశవ్యాప్తంగా సంచలనం సృష్టించింది. ఆ తర్వాత 2022లో కూడా ఎన్‌ఐఏ అధికారులు సోదాలు నిర్వహించడం గమనార్హం. తాజా ఘటనతో పట్టణ ప్రజలు మరోసారి ఉలిక్కిపడ్డారు.