అమెరికాలో దారుణం... బహిరంగ మూత్ర విసర్జన వద్దన్నందుకు హర్యానా యువకుడి కాల్చివేత

అమెరికాలో మెరుగైన భవిష్యత్తును వెతుక్కుంటూ వెళ్లిన ఓ భారతీయ యువకుడి జీవితం ఒక్క తూటాతో అర్ధాంతరంగా ముగిసింది. అత్యంత చిన్న విషయానికి జరిగిన ఘర్షణలో ఓ దుండగుడు అతడిని తుపాకీతో కాల్చి చంపాడు. హర్యానాలోని జింద్ జిల్లాకు చెందిన కపిల్ (26) ఈ దారుణానికి బలయ్యాడు.

వివరాల్లోకి వెళ్తే, కపిల్ కాలిఫోర్నియాలోని ఒక స్టోర్‌లో సెక్యూరిటీ గార్డుగా పనిచేస్తున్నాడు. స్టోర్ బయట ఓ వ్యక్తి బహిరంగంగా మూత్రవిసర్జన చేస్తుండగా కపిల్ అభ్యంతరం వ్యక్తం చేశాడు. దీంతో ఇద్దరి మధ్య వాగ్వాదం మొదలైంది. ఆగ్రహంతో ఊగిపోయిన ఆ వ్యక్తి కాసేపటికే తుపాకీతో తిరిగివచ్చి కపిల్‌పై కాల్పులు జరిపి హత్య చేశాడని అతని గ్రామ సర్పంచ్ సురేష్ కుమార్ గౌతమ్ మీడియాకు వెల్లడించారు.

కపిల్ ఓ నిరుపేద రైతు కుటుంబానికి చెందినవాడు. ఉన్న కొద్దిపాటి పొలంతోనే అతని తండ్రి జీవనం సాగిస్తున్నారు. కుటుంబానికి ఆసరాగా నిలవాలనే ఆశతో సుమారు మూడేళ్ల క్రితం కపిల్ అమెరికాకు పయనమయ్యాడు. ఇందుకోసం అతని కుటుంబం దాదాపు రూ. 45 లక్షల వరకు ఖర్చు చేసింది. మెక్సికో సరిహద్దు దాటి, పనామా అడవుల గుండా అత్యంత ప్రమాదకరమైన 'డంకీ రూట్' ద్వారా అతను అమెరికాలో అడుగుపెట్టాడు.

కపిల్‌కు తల్లిదండ్రులు, ఇద్దరు సోదరీమణులు ఉన్నారు. ఉన్న ఒక్కగానొక్క కొడుకు ఇలా విగతజీవిగా మారడంతో ఆ కుటుంబం శోకసంద్రంలో మునిగిపోయింది. కపిల్ మృతదేహాన్ని స్వగ్రామానికి తీసుకువచ్చేందుకు కేంద్ర, హర్యానా ప్రభుత్వాలు చొరవ చూపాలని కుటుంబ సభ్యులు, గ్రామస్థులు కోరుతున్నారు. ఈ విషయంపై డిప్యూటీ కమిషనర్‌ను కలిసి వినతిపత్రం సమర్పించనున్నట్లు సర్పంచ్ తెలిపారు. ఇటీవలి కాలంలో అమెరికాలో భారతీయులపై దాడులు పెరగడం తీవ్ర ఆందోళన కలిగిస్తోంది.