'బాహుబలి' ఆఫర్ ను శ్రీదేవి ఎందుకు వదులుకుందో చెప్పిన బోనీ కపూర్

భారత సినీ చరిత్రలో ఒక మైలురాయిగా నిలిచిన ‘బాహుబలి’ చిత్రంలో శివగామి పాత్రను దివంగత నటి శ్రీదేవి ఎందుకు తిరస్కరించారనే అంశంపై ఏళ్లుగా కొనసాగుతున్న వివాదానికి ఆమె భర్త, ప్రముఖ నిర్మాత బోనీ కపూర్ తెరదించారు. శ్రీదేవి భారీ డిమాండ్లు చేశారంటూ వచ్చిన వార్తలను ఆయన తీవ్రంగా ఖండించారు. ‘బాహుబలి’ నిర్మాతలు ఆమెకు తక్కువ పారితోషికం ఆఫర్ చేయడమే కాకుండా, దర్శకుడు ఎస్.ఎస్. రాజమౌళిని తప్పుదోవ పట్టించారని సంచలన ఆరోపణలు చేశారు. ఇటీవల ఒక యూట్యూబ్ షోలో పాల్గొన్న బోనీ కపూర్ ఈ విషయాలను వెల్లడించారు.

అసలు జరిగిందేమిటంటే..!
‘గేమ్ చేంజర్స్’ అనే యూట్యూబ్ షోలో బోనీ కపూర్ మాట్లాడుతూ, "రాజమౌళి గారు మా ఇంటికి వచ్చి శ్రీదేవికి కథ వివరించారు. ఆయనపై మాకు ఎంతో గౌరవం ఉంది. ఆయన వెళ్లిపోయిన తర్వాత, నిర్మాతలు పారితోషికం విషయం ప్రస్తావించారు. అప్పటికే ‘ఇంగ్లీష్ వింగ్లీష్’ వంటి విజయవంతమైన చిత్రంలో నటించిన శ్రీదేవికి, ఆ సినిమా కంటే తక్కువ రెమ్యూనరేషన్ ఆఫర్ చేశారు. శ్రీదేవి అప్పటికే ఒక స్టార్, ఆమె ఏమీ సమస్యల్లో ఉన్న నటి కాదు. ఆమె పేరుతో సినిమాకు హిందీ, తమిళ మార్కెట్లలో ప్రచారం లభిస్తుంది. అలాంటప్పుడు ఆమెను అంత తక్కువ చేసి ఎందుకు అడగాలి?" అని బోనీ కపూర్ ఆవేదన వ్యక్తం చేశారు. ఇది తమను అవమానించినట్లుగా అనిపించిందని ఆయన స్పష్టం చేశారు.

రాజమౌళిని తప్పుదోవ పట్టించారు!
నిర్మాతలు శ్రీదేవికి ఎంత ఆఫర్ చేశారనే నిజాన్ని రాజమౌళికి చెప్పకుండా దాచిపెట్టారని బోనీ కపూర్ ఆరోపించారు. "నిర్మాతలు రాజమౌళి దగ్గరకు వెళ్లి, శ్రీదేవి హోటల్‌లో ఒక ఫ్లోర్ మొత్తం కావాలని, పెద్ద ఎత్తున సిబ్బంది కావాలని డిమాండ్ చేసినట్లు అబద్ధాలు చెప్పారు. మేము కేవలం మా పిల్లల స్కూల్ సెలవులకు అనుగుణంగా షూటింగ్ షెడ్యూల్స్ ప్లాన్ చేయమని మాత్రమే కోరాము. అంతకుమించి ఎలాంటి అహేతుకమైన డిమాండ్లు చేయలేదు. ఈ నిర్మాతలు రాజమౌళిని పూర్తిగా తప్పుదోవ పట్టించారు," అని ఆయన పేర్కొన్నారు. శ్రీదేవి ప్రొఫెషనలిజంను ప్రశ్నించడాన్ని తప్పుబడుతూ, "రాకేష్ రోషన్, యశ్ చోప్రా, రాఘవేంద్రరావు వంటి దిగ్గజ దర్శకులు ఆమెతో పదే పదే ఎందుకు సినిమాలు చేశారు? ఆమె ప్రొఫెషనల్ కాకపోతే ఇది సాధ్యమయ్యేదా?" అని బోనీ కపూర్ ప్రశ్నించారు.