ఎన్డీఏకు దినకరన్ షాక్.. తమిళనాడులో కూటమిని వీడిన ఏఎంఎంకే

కేంద్రంలో వరుసగా మూడోసారి అధికారంలోకి వచ్చి జోరు మీదున్న ఎన్డీయేకు తమిళనాడులో అనూహ్య పరిణామం ఎదురైంది. ఎన్డీయే కూటమి నుంచి వైదొలగుతున్నట్టు రాష్ట్రానికి చెందిన ‘అమ్మ మక్కల్ మున్నేట్ర కళగం’ (ఏఎంఎంకే) సంచలన ప్రకటన చేసింది. ఈ నిర్ణయంతో బీజేపీ నేతృత్వంలోని కూటమితో తమ బంధం ముగిసిందని ఆ పార్టీ స్పష్టం చేసింది.

ఈ విషయాన్ని ఏఎంఎంకే పార్టీ ప్రధాన కార్యదర్శి టీటీవీ దినకరన్ స్వయంగా వెల్లడించారు. ఇకపై తమ పార్టీ తమిళనాడులో ఎన్డీఏలో భాగస్వామిగా కొనసాగబోదని ఆయన తేల్చిచెప్పారు. ఈ నిర్ణయం తక్షణమే అమల్లోకి వస్తుందని తెలిపారు.

రాబోయే 2026 తమిళనాడు అసెంబ్లీ ఎన్నికలను దృష్టిలో ఉంచుకుని తమ పార్టీ ఈ కీలక నిర్ణయం తీసుకున్నట్లు దినకరన్ వివరించారు. భవిష్యత్ కార్యాచరణ, పొత్తుల విషయమై ఈ ఏడాది డిసెంబర్‌లో పార్టీ ముఖ్య నేతలు, కార్యకర్తలతో సమావేశమై చర్చిస్తామని ఆయన పేర్కొన్నారు. ఆ సమావేశంలోనే ఏ కూటమితో కలిసి పనిచేయాలనే దానిపై తుది నిర్ణయం తీసుకుంటామని దినకరన్ వెల్లడించారు. ఈ పరిణామం తమిళనాడు రాజకీయాల్లో ఆసక్తిని రేకెత్తిస్తోంది.