తన పెళ్లెప్పుడో చెప్పిన నారా రోహిత్

విలక్షణ నటుడు నారా రోహిత్ త్వరలోనే ఓ ఇంటివాడు కాబోతున్నారు. తన వివాహ తేదీపై వస్తున్న ఊహాగానాలకు తెరదించుతూ, ఎప్పుడు పెళ్లి చేసుకోబోతున్నారో స్వయంగా వెల్లడించారు. ‘ప్రతినిధి 2’ చిత్ర కథానాయిక శిరీష (సిరి)ను ఆయన పెళ్లాడనున్నారు.

తాజాగా ఆయన నటించిన ‘సుందరకాండ’ చిత్రం మంచి విజయం సాధించింది. ఈ సందర్భంగా గుంటూరులో ఏర్పాటు చేసిన విజయోత్సవ సభలో పాల్గొన్న రోహిత్, అభిమానులతో ఈ శుభవార్తను పంచుకున్నారు. ఈ ఏడాది అక్టోబర్ లేదా నవంబర్ నెలలో తమ వివాహం జరగనుందని ఆయన స్పష్టం చేశారు. గత ఏడాది అక్టోబర్‌లోనే శిరీషతో రోహిత్ నిశ్చితార్థం జరిగిన సంగతి తెలిసిందే.

హాస్యం, ప్రేమ కథాంశంతో తెరకెక్కిన ‘సుందరకాండ’ చిత్రం యువతను, కుటుంబ ప్రేక్షకులను ఆకట్టుకుంటోంది. ఈ సినిమాకు వస్తున్న ఆదరణ పట్ల చిత్ర బృందం ఆనందం వ్యక్తం చేసింది. ఈ విజయోత్సవ వేడుకలో భాగంగానే రోహిత్ తన వ్యక్తిగత జీవితానికి సంబంధించిన కీలక ప్రకటన చేయడం విశేషం.

‘బాణం’, ‘ప్రతినిధి’, ‘రౌడీ ఫెలో’ వంటి విభిన్నమైన చిత్రాలతో నారా రోహిత్ టాలీవుడ్‌లో తనకంటూ ఓ ప్రత్యేక స్థానాన్ని సంపాదించుకున్నారు. చాలా కాలంగా ఆయన పెళ్లి గురించి ఎదురుచూస్తున్న అభిమానులకు ఈ వార్త ఆనందాన్నిచ్చింది.