నివేదా పేతురాజ్ కాబోయే భర్త ఇతడే!

అల వైకుంఠపురములో’, ‘బ్రోచేవారెవరురా’ వంటి చిత్రాలతో తెలుగు ప్రేక్షకులకు దగ్గరైన నటి నివేదా పేతురాజ్ త్వరలో వైవాహిక జీవితంలోకి అడుగుపెట్టనున్నారు. దుబాయ్‌కు చెందిన వ్యాపారవేత్త రాజ్ హిత్ ఇబ్రాన్‌ను తాను వివాహం చేసుకోబోతున్నట్లు ఆమె అధికారికంగా ప్రకటించారు. ఇటీవల తన కాబోయే భర్తతో దిగిన ఫోటోలను సోషల్ మీడియాలో పంచుకుని అందరినీ ఆశ్చర్యపరిచిన ఆమె, తాజాగా ఓ ఇంటర్వ్యూలో పెళ్లి వివరాలను వెల్లడించారు.

వచ్చే అక్టోబర్‌లో తమ నిశ్చితార్థం, 2026 జనవరిలో వివాహం జరగనున్నట్లు నివేదా తెలిపారు. అయితే, తేదీలు ఇంకా ఖరారు కాలేదని, ఈ వేడుకలను చాలా నిరాడంబరంగా, కేవలం కుటుంబ సభ్యుల మధ్య నిర్వహించాలని భావిస్తున్నట్లు ఆమె పేర్కొన్నారు. రాజ్ హిత్‌తో తన పరిచయం గురించి చెబుతూ, ఐదేళ్ల క్రితం దుబాయ్‌లో జరిగిన ఫార్ములా ఈ రేసింగ్ కార్యక్రమంలో తాము తొలిసారి కలుసుకున్నామని, ఆ స్నేహం క్రమంగా ప్రేమగా మారిందని వివరించారు.

ఇన్నాళ్లూ తమ ప్రేమ వ్యవహారాన్ని చాలా గోప్యంగా ఉంచామని, తన మేనేజర్‌తో సహా చిత్ర పరిశ్రమలో ఎవరికీ ఈ విషయం తెలియదని నివేదా అన్నారు. రాజ్ హిత్‌కు సినిమాలు ఇష్టమని, తన నటన కెరీర్‌కు ఆయన పూర్తి మద్దతు ఇస్తారని ఆమె విశ్వాసం వ్యక్తం చేశారు. కాగా, నటనతో పాటు క్రీడలపై ఆసక్తి ఉన్న నివేదా పేతురాజ్‌కు రేసింగ్, బ్యాడ్మింటన్‌లో కూడా ప్రావీణ్యం ఉంది. రాజ్ హిత్ భారత సంతతికి చెందిన వ్యక్తి అయినప్పటికీ, దుబాయ్‌లో వ్యాపారాలు నిర్వహిస్తున్నారు.