Niharika Konidela: నా రెండు ప్రపంచాలు కలిశాయి: నిహారిక ఎమోషనల్ పోస్ట్

మెగా డాటర్ నిహారిక కొణిదెల ఒకేసారి రెండు పడవలపై విజయవంతంగా ప్రయాణం చేస్తున్నారు. ఒకవైపు నిర్మాతగా రాణిస్తూనే, మరోవైపు నటిగా కెమెరా ముందుకొస్తున్నారు. తాజాగా తన ఇన్‌స్టాగ్రామ్‌లో షేర్ చేసిన ఓ పోస్ట్ ద్వారా.. ఈ రెండు పాత్రలను తాను ఎంతగా ఆస్వాదిస్తున్నారో తెలియజేశారు. ఒకే రోజు నటిగా, నిర్మాతగా తన రెండు ప్రపంచాలు ఒకేచోట కలిశాయని, ఆ క్షణం తన మనసు ఆనందంతో నిండిపోయిందని ఆమె పేర్కొన్నారు.

వివరాల్లోకి వెళితే, నిహారిక తాజాగా ఓ రియాలిటీ షోలో గెస్ట్‌గా పాల్గొన్నారు. నటిగా ఆ షోలో డ్యాన్స్ చేస్తూ సందడి చేశారు. ఆ కార్యక్రమం షూటింగ్ జరిగిన భవనానికి పక్కనే ఆమె నిర్మాణ సంస్థ ‘ది ఎలిఫెంట్ పిక్చర్’ ఆఫీసు ఉంది. షో పూర్తయిన వెంటనే, ఆమె నేరుగా తన ఆఫీసుకు వెళ్లి నిర్మాతగా నిర్మాణ పనులను పర్యవేక్షించారు. ఇది తనను ఎంతగానో సంతోషపెట్టిందని నిహారిక తన పోస్ట్‌లో తెలిపారు.

"నటన నా ప్యాషన్ అయితే, నిర్మాతగా మారడం నా ఎదుగుదలకు కారణమైంది. ఈ రెండింటిలో ఏది ఎక్కువ ఇష్టమని చాలామంది అడుగుతుంటారు. నిజం చెప్పాలంటే నేను ఒకదాన్ని ఎంచుకోలేను. ఈ విషయం నిన్న స్పష్టంగా రుజువైంది. ఒకేరోజు కెమెరా ముందు నటిగా, ఆ పక్కనే ఉన్న ఆఫీసులో నిర్మాతగా కనిపించడం నా ప్రయాణాన్ని గుర్తుచేసింది" అని నిహారిక తన భావాలను పంచుకున్నారు.

నిర్మాతగా తన తొలి చిత్రం ‘కమిటీ కుర్రాళ్ళు’తో మంచి విజయాన్ని అందుకున్న నిహారిక, ప్రస్తుతం ‘మ్యాడ్’ ఫేమ్ సంగీత్ శోభన్‌తో తన రెండో చిత్రాన్ని నిర్మిస్తున్నారు. ఈ సినిమా షూటింగ్ వేగంగా జరుగుతోంది. నిహారిక పోస్ట్ చూసిన నెటిజన్లు ఆమెకు శుభాకాంక్షలు తెలుపుతున్నారు. అలాగే, తన రెండో సినిమాలో నిహారిక కూడా కీలక పాత్రలో నటిస్తుండవచ్చని కొందరు గెస్ చేస్తున్నారు.