నా జీవితాన్నే మార్చేసిన సినిమా.. 'అర్జున్ రెడ్డి'పై సందీప్ రెడ్డి వంగా ఎమోష‌న‌ల్ పోస్ట్

విజయ్ దేవరకొండ కెరీర్‌లో ఒక సంచలనం సృష్టించిన చిత్రం 'అర్జున్ రెడ్డి'. ఈ సినిమా విడుదలై ఇవాళ్టితో ఎనిమిది సంవత్సరాలు పూర్తయింది. ఈ ప్రత్యేక సందర్భాన్ని పురస్కరించుకుని చిత్ర దర్శకుడు సందీప్ రెడ్డి వంగా సోషల్ మీడియాలో ఒక భావోద్వేగ పోస్ట్ పెట్టారు. ఈ సినిమా తన జీవితాన్ని ఎలా మార్చేసిందో వివరిస్తూ, తన ప్రయాణాన్ని గుర్తు చేసుకున్నారు.

"ఎనిమిదేళ్ల క్రితం 'అర్జున్ రెడ్డి' నా జీవితాన్ని శాశ్వతంగా మార్చేసింది. నా మనసుకు దగ్గరైన ఒక కథ. కేవలం మీ ప్రేమ, అంతులేని మద్దతు వల్లే ఒక ఉద్యమంలా మారింది. ఈ సినిమాలోని ప్రతి ఫ్రేమ్, ప్రతి డైలాగ్, ప్రతి ఎమోషన్‌కు ఒక అర్థం వచ్చిందంటే, దాన్ని మీరు నిజాయతీగా, ఇష్టంగా స్వీకరించడమే కారణం" అని సందీప్ తన ఇన్‌స్టాగ్రామ్ పోస్ట్‌లో రాసుకొచ్చారు.

అంతేకాకుండా, తన నటీనటులకు, చిత్ర బృందానికి, ముఖ్యంగా ఇన్నేళ్లయినా 'అర్జున్ రెడ్డి'ని ఆదరిస్తున్న ప్రేక్షకులందరికీ తాను ఎప్పటికీ రుణపడి ఉంటానని ఆయన తెలిపారు. "ఇప్పటికీ ఎంతో తాజాగా, సహజంగా, సజీవంగా అనిపించే ఈ ఎనిమిదేళ్ల ప్రయాణానికి ధన్యవాదాలు. ఈ సినిమాను శాశ్వతంగా నిలిపినందుకు మీకు థ్యాంక్స్" అని సందీప్ పేర్కొన్నారు. ఈ పోస్ట్‌తో పాటు సినిమా మేకింగ్ సమయంలో హీరో విజయ్ దేవరకొండతో కలిసి ఉన్న ఒక పాత వీడియోను కూడా ఆయన షేర్ చేశారు.

విజయ్ దేవరకొండ, షాలినీ పాండే జంటగా నటించిన 'అర్జున్ రెడ్డి' చిత్రం అప్పట్లో పెను సంచలనం సృష్టించిన విషయం తెలిసిందే. భద్రకాళి పిక్చర్స్ నిర్మించిన ఈ సినిమాకు ఒక వర్గం ప్రేక్షకుల నుంచి విపరీతమైన ప్రశంసలు లభించగా, మరోవైపు మహిళా వ్యతిరేకతను, మాదకద్రవ్యాల వినియోగాన్ని ప్రోత్సహిస్తోందంటూ తీవ్ర విమర్శలు కూడా ఎదుర్కొంది. సుమారు 5 కోట్ల బడ్జెట్‌తో తెరకెక్కిన ఈ చిత్రం, ప్రపంచవ్యాప్తంగా బాక్సాఫీస్ వద్ద 50 కోట్లకు పైగా గ్రాస్ వసూళ్లు సాధించి భారీ విజయాన్ని అందుకుంది.