ఐటీఆర్ గడువు మళ్లీ పొడిగించండి: సీబీడీటీకి పరిశ్రమల ఛాంబర్ విజ్ఞప్తి!

ఆదాయపు పన్ను రిటర్నుల (ఐటీఆర్) ఫైలింగ్ గడువును పొడిగించాలనే డిమాండ్ మరోసారి తెరపైకి వచ్చింది. 2025-26 మదింపు సంవత్సరానికి సంబంధించి ఐటీఆర్ ఫైలింగ్, ట్యాక్స్ ఆడిట్ నివేదికల సమర్పణ గడువును పొడిగించాలని గుజరాత్ ఛాంబర్ ఆఫ్ కామర్స్ అండ్ ఇండస్ట్రీ (జీసీసీఐ) కేంద్ర ప్రత్యక్ష పన్నుల బోర్డు (సీబీడీటీ)ని కోరింది. ఐటీఆర్ యుటిలిటీల (ఫారాలు) విడుదలలో తీవ్ర జాప్యం జరగడం, ఈ-ఫైలింగ్ పోర్టల్‌లో సాంకేతిక సమస్యలు తలెత్తడం వంటి కారణాలతో ప్రస్తుత గడువులోగా రిటర్నులు దాఖలు చేయడం కష్టసాధ్యమని స్పష్టం చేసింది.

ఈ మేరకు జీసీసీఐ ఇటీవల సీబీడీటీకి ఒక వినతిపత్రం సమర్పించింది. సాధారణంగా ప్రతి ఏటా ఏప్రిల్ నాటికి అన్ని రకాల ఐటీఆర్ ఫారాలు అందుబాటులోకి వస్తాయని, కానీ ఈసారి వాటి విడుదలలో సగటున మూడు నెలల జాప్యం జరిగిందని ఛాంబర్ పేర్కొంది. ఆగస్టు మొదటి వారం వచ్చినా కొన్ని ముఖ్యమైన ఫారాలు ఇంకా విడుదల కాలేదని తెలిపింది. ఐటీఆర్-1 నుంచి 4 వరకు జూలై 30న అందుబాటులోకి రాగా, ట్యాక్స్ ఆడిట్ ఫారాలైన 3సీఏ-3సీడీ, 3సీబీ-3సీడీలను జూలై 29న విడుదల చేశారని గుర్తు చేసింది.

అత్యధిక సంఖ్యలో సంస్థలు, ఎల్ఎల్‌పీలు, ట్రస్టులు వినియోగించే ఐటీఆర్-5 ఫారాన్ని ఆగస్టు 8న విడుదల చేశారని జీసీసీఐ తెలిపింది. ఆడిట్ పరిధిలోకి రాని కేసులకు గడువు సెప్టెంబర్ 15గా ఉన్నందున, రిటర్నులను సిద్ధం చేసి, దాఖలు చేయడానికి పన్ను చెల్లింపుదారులకు, నిపుణులకు చాలా తక్కువ సమయం మిగిలి ఉందని ఆందోళన వ్యక్తం చేసింది. మరోవైపు ఐటీఆర్-6, ఐటీఆర్-7 ఫారాలు ఇప్పటికీ అందుబాటులోకి రాలేదని నొక్కి చెప్పింది.

ఈ సమస్యలకు తోడు ఆదాయపు పన్ను ఈ-ఫైలింగ్ పోర్టల్‌లో తరచూ తలెత్తుతున్న సాంకేతిక సమస్యలు ఫైలింగ్ ప్రక్రియను మరింత క్లిష్టతరం చేస్తున్నాయని జీసీసీఐ అభిప్రాయపడింది. యుటిలిటీలలో మార్పుల కారణంగా సాఫ్ట్‌వేర్ సంస్థలు తమ సిస్టమ్‌లను అప్‌డేట్ చేయడానికి కూడా సమయం పడుతోందని, ఇది కూడా జాప్యానికి కారణమవుతోందని పేర్కొంది. ఈ నేపథ్యంలో పన్ను చెల్లింపుదారులకు, వృత్తి నిపుణులకు ఊరట కల్పించేందుకు, ప్రస్తుతం సెప్టెంబర్ 30గా ఉన్న ట్యాక్స్ ఆడిట్ గడువుతో పాటు ఐటీఆర్ ఫైలింగ్ గడువును కూడా పొడిగించాలని సీబీడీటీని జీసీసీఐ కోరింది.