పాక్ క్రికెటర్లకు పీసీబీ షాక్.. జీతాల్లో భారీ కోతకు రంగం సిద్ధం

అంతర్జాతీయ క్రికెట్‌లో పేలవ ప్రదర్శనతో తీవ్ర విమర్శలు ఎదుర్కొంటున్న పాకిస్థాన్ క్రికెట్ జట్టుకు మరో గట్టి ఎదురుదెబ్బ తగిలేలా ఉంది. వరుస ఓటములతో నిరాశపరుస్తున్న బాబర్ అజామ్, మహమ్మద్ రిజ్వాన్ వంటి కీలక ఆటగాళ్ల జీతాల్లో కోత విధించేందుకు పాకిస్థాన్ క్రికెట్ బోర్డు (పీసీబీ) సిద్ధమవుతున్నట్టు తెలుస్తోంది. ముఖ్యంగా ఇటీవలే వెస్టిండీస్ చేతిలో వన్డే సిరీస్‌ను ఘోరంగా కోల్పోవడం ఈ అంశానికి మరింత బలాన్నిచ్చింది.

ఈ ఏడాది పాకిస్థాన్ ప్రదర్శన అన్ని ఫార్మాట్లలోనూ అత్యంత దారుణంగా ఉంది. ఆడిన 11 వన్డే మ్యాచ్‌లలో కేవలం రెండింటిలో మాత్రమే గెలిచి, మిగతా వాటిలో ఘోరంగా విఫలమైంది. ఇక టీ20ల విషయానికొస్తే, 14 మ్యాచ్‌లకు గానూ ఏడింటిలో గెలిచి, మరో ఏడింటిలో ఓటమి పాలైంది. టెస్టుల్లోనూ ఆడిన మూడు మ్యాచ్‌ల్లో ఒకే ఒక్క విజయాన్ని నమోదు చేసింది. ఈ గణాంకాలు జట్టు ఆటతీరుకు అద్దం పడుతున్నాయి.

ఇటీవల వెస్టిండీస్‌తో జరిగిన వన్డే సిరీస్ ఓటమి పాకిస్థాన్ క్రికెట్ చరిత్రలోనే ఒక చేదు జ్ఞాపకంగా మిగిలిపోయింది. 1991 తర్వాత విండీస్ చేతిలో పాక్ ద్వైపాక్షిక వన్డే సిరీస్ కోల్పోవడం ఇదే ప్రథమం. చివరి వన్డేలో ఏకంగా 202 పరుగుల భారీ తేడాతో ఓడిపోవడం జట్టును తీవ్రంగా దెబ్బతీసింది. 

ఈ నేపథ్యంలో ఆటగాళ్ల సెంట్రల్ కాంట్రాక్టుల నుంచి ఒక కీలక నిబంధనను తొలగించాలని పీసీబీ భావిస్తున్నట్టు 'క్రికెట్ పాకిస్థాన్' నివేదిక వెల్లడించింది. రెండేళ్ల క్రితం సీనియర్ ఆటగాళ్ల ఒత్తిడి మేరకు, అంతర్జాతీయ క్రికెట్ కౌన్సిల్ (ఐసీసీ) నుంచి వచ్చే ఆదాయంలో 3 శాతం వాటాను ఆటగాళ్లకు ఇచ్చేలా పీసీబీ అంగీకరించింది. ప్రస్తుతం ఈ నిబంధనను కాంట్రాక్టుల నుంచి తొలగించాలని బోర్డు నిర్ణయించినట్లు సమాచారం. కొన్ని చట్టపరమైన చిక్కుల వల్ల ఈ ఏర్పాటును వెంటనే రద్దు చేయలేకపోయినా, రాబోయే కొత్త కాంట్రాక్టులలో ఈ నిబంధనను చివరిసారిగా చేర్చి, ఆ తర్వాత పూర్తిగా ఎత్తివేయాలని పీసీబీ యోచిస్తున్నట్టు తెలుస్తోంది.