కానిస్టేబుల్‌ను తోసేసి.. ముంబై ఆసుపత్రి నుంచి గర్భిణి అయిన బంగ్లా ఖైదీ పరారీ

పోలీసుల కట్టుదిట్టమైన భద్రతను ఛేదించుకుని, ఐదు నెలల గర్భవతి అయిన బంగ్లాదేశ్ ఖైదీ ఒకరు ఆసుపత్రి నుంచి పరారైన ఘటన ముంబైలో సంచలనం సృష్టిస్తోంది. నగరంలోని జేజే ఆసుపత్రిలో గురువారం మధ్యాహ్నం జరిగిన ఈ సంఘటన, ఖైదీల భద్రత విషయంలో పోలీసుల వైఫల్యాన్ని ఎత్తి చూపుతోంది.

వివరాల్లోకి వెళితే.. నకిలీ జనన ధ్రువీకరణ పత్రం ద్వారా భారత పాస్‌పోర్ట్ సంపాదించిందన్న ఆరోపణలపై వాషి పోలీసులు ఆగస్టు 7న రుబినా ఇర్షాద్ షేక్ (25) అనే బంగ్లాదేశ్ మహిళను అరెస్ట్ చేశారు. ఆమెపై ఇండియన్ పీనల్ కోడ్, పాస్‌పోర్ట్ యాక్ట్, ఫారినర్స్ యాక్ట్ కింద కేసులు నమోదు చేసి, బైకుల్లా మహిళా జైలుకు తరలించారు.

అయితే, జ్వరం, జలుబు, చర్మ సంబంధిత సమస్యలతో బాధపడుతున్న రుబినాను, ఆమె గర్భవతి కావడంతో వైద్య పరీక్షల నిమిత్తం ఈ నెల‌ 11న జేజే ఆసుపత్రికి తరలించారు. ఈ క్రమంలో గురువారం మధ్యాహ్నం, తనకు ఎస్కార్ట్‌గా ఉన్న ఓ మహిళా కానిస్టేబుల్‌ను ఒక్కసారిగా పక్కకు తోసేసింది. ఆ వెంటనే ఆసుపత్రిలోని జనసందోహాన్ని ఆసరాగా చేసుకుని అక్కడి నుంచి ఉడాయించింది.

ఈ అనూహ్య పరిణామంతో అప్రమత్తమైన ముంబై పోలీసులు, గాలింపు చర్యలు మొదలెట్టారు. పరారైన రుబినాను పట్టుకోవడానికి ప్రత్యేక బృందాలను రంగంలోకి దించారు. ఈ ఘటన ఆసుపత్రి ప్రాంగణంలో ఖైదీలకు కల్పించే భద్రతపై తీవ్ర చర్చకు దారితీసింది.