గిల్ భుజాలపై టీమిండియా.. అద్భుతమన్న పాక్ మాజీ క్రికెటర్

తాజాగా ఇంగ్లండ్‌లో ముగిసిన టెస్ట్ సిరీస్‌లో భారత జట్టుకు కెప్టెన్‌గా వ్యవహరించిన యువ సంచలనం శుభ్‌మన్ గిల్ అసాధారణ ప్రదర్శనతో అందరినీ అబ్బురపరిచాడు. బ్యాటర్‌గా, నాయకుడిగా అద్వితీయ ప్రతిభ కనబరిచిన గిల్‌పై పాకిస్థాన్ మాజీ క్రికెటర్ డానిష్ కనేరియా ప్రశంసల వర్షం కురిపించాడు. గిల్ ప్రదర్శన నమ్మశక్యంగా లేదని, అతను జట్టును పూర్తిగా తన భుజాలపై మోశాడని కనేరియా కొనియాడాడు.

ఐదు మ్యాచ్‌ల ఈ హోరాహోరీ సిరీస్‌లో కెప్టెన్ గిల్ పరుగుల వరద పారించాడు. ఏకంగా 75.4 సగటుతో మొత్తం 754 పరుగులు సాధించి రికార్డుకెక్కిన విష‌యం తెలిసిందే. ముఖ్యంగా ఎడ్జ్‌బాస్టన్ వేదికగా జరిగిన టెస్టులో జంట సెంచరీలతో చారిత్రక ఇన్నింగ్స్ ఆడాడు. ఈ ఒక్క మ్యాచ్‌లోనే అతను 430 పరుగులు చేయడం విశేషం. ఒకే టెస్టులో ఒక బ్యాటర్ చేసిన అత్యధిక పరుగుల జాబితాలో ఇది రెండో స్థానం. 1990లో గ్రాహం గూచ్ చేసిన 456 పరుగుల తర్వాత ఇదే అత్యధికం.

గిల్ అద్భుత బ్యాటింగ్‌తో పాటు, అతని నాయకత్వ పటిమ కూడా సిరీస్‌కు కీలకంగా నిలిచింది. కఠినమైన ఇంగ్లండ్ పరిస్థితుల్లో ప్రశాంతంగా, అదే సమయంలో దృఢంగా జట్టును నడిపించాడు. ఆల్‌రౌండర్ రవీంద్ర జడేజాతో కలిసి కీలక భాగస్వామ్యాలు నెలకొల్పి జట్టుకు భారీ స్కోర్లు అందించాడు. ఎడ్జ్‌బాస్టన్ టెస్టులో భారత్ 427/6 వద్ద డిక్లేర్ చేసి, ఇంగ్లండ్ ముందు 608 పరుగుల భారీ లక్ష్యాన్ని నిర్దేశించడం గిల్ వ్యూహాత్మక నాయకత్వానికి నిదర్శనం.

చివరకు 2-2తో సమంగా ముగిసిన ఈ సిరీస్‌తో భారత టెస్ట్ క్రికెట్‌లో కొత్త శకం ఆరంభమైందని విశ్లేషకులు భావిస్తున్నారు. "శుభ్‌మన్ గిల్ శకం గొప్ప ప్రతిభ, పట్టుదలతో ప్రారంభమైంది" అని బీసీసీఐ సైతం వ్యాఖ్యానించింది. ఈ ప్రదర్శనతో గిల్ భారత క్రికెట్‌లో తర్వాతి తరం నాయకుడిగా తన స్థానాన్ని సుస్థిరం చేసుకున్నాడు.