Salman Khan: చిత్రీకరణలో తోటి నటుడి మెడపై నిజమైన కత్తిపెట్టిన సల్మాన్ ఖాన్... అప్పుడేం జరిగిందంటే!

బాలీవుడ్ సీనియర్ నటుడు అశోక్ సరాఫ్ 1992లో సల్మాన్ ఖాన్ నటించిన 'జాగృతి' సినిమా సెట్స్‌లో జరిగిన ఒక భయంకరమైన సంఘటనను గుర్తు చేసుకున్నారు. ఒక సీరియస్ సన్నివేశం చిత్రీకరణ సమయంలో, నిజమైన కత్తిని ఉపయోగించారు. దాంతో తనకు గొంతు తెగిందని సరాఫ్ ఓ ఇంటర్వ్యూలో వెల్లడించారు.

సీన్ లో భాగంగా... సల్మాన్ ఖాన్ తన మెడపై కత్తిపెట్టారని, అయితే ఆయన తన గొంతును ఊహించని విధంగా గట్టిగా పట్టుకోవడంతో, తనకు తీవ్రమైన గాయం అయిందని సరాఫ్ తెలిపారు. నిజమైన కత్తి కావడంతో కోసుకుపోతోందని సల్మాన్ ఖాన్‌ను సరాఫ్ హెచ్చరించినప్పటికీ ఫలితంలేకపోయింది. అప్పటికే తనకు లోతైన గాయం అయిందని సరాఫ్ తెలిపారు. ఆ షాట్ కు పెట్టిన కెమెరా యాంగిల్ కారణంగా చిత్ర యూనిట్ సభ్యులు కూడా ఆ విషయం గుర్తించలేకపోయారు.

ఆ ప్రాణాంతక క్షణాన్ని తాను ఎప్పటికీ మర్చిపోలేనని సరాఫ్ అన్నారు. ఈ సంఘటన తర్వాత కూడా, సరాఫ్ సల్మాన్ ఖాన్‌తో 'కరణ్ అర్జున్', 'ప్యార్ కియా తో డర్నా క్యా' వంటి అనేక విజయవంతమైన చిత్రాలలో పని చేశారు. ఈ సంఘటనను సల్మాన్ ఖాన్ గుర్తుంచుకున్నాడో లేదో తనకు తెలియదని సరాఫ్ అన్నారు, "అలాంటి వ్యక్తులు ఇటువంటి విషయాలను గుర్తుంచుకోరు, వారు మర్చిపోతారు" అని సరదాగా వ్యాఖ్యానించారు.