బ్రాడ్ పిట్ 'ఎఫ్1' సినిమాను కలిసి వీక్షించిన ప్రభాస్, ప్రశాంత్ నీల్... ఫొటోలు వైరల్!

రెబల్ స్టార్ ప్రభాస్, దర్శకుడు ప్రశాంత్ నీల్ తాజాగా హైదరాబాద్‌లోని ప్రసాద్స్ మల్టీప్లెక్స్‌లో సందడి చేశారు. హాలీవుడ్ స్టార్ బ్రాడ్ పిట్ నటించిన 'ఎఫ్1' సినిమాను వీక్షించారు. సినిమా చూసిన తర్వాత ప్రభాస్, ప్రశాంత్ నీల్ థియేటర్ సిబ్బందితో కలిసి ఫోటోలు దిగారు. ఈ ఫోటోలు ప్రస్తుతం సోషల్ మీడియాలో వైరల్ అవుతున్నాయి.

ప్రభాస్, ప్రశాంత్ నీల్ తమ అధికారిక సోషల్ మీడియా ఖాతాలలో ఈ ఫోటోలను పంచుకోనప్పటికీ, అభిమానులు తీసిన చిత్రాలు ఇంటర్నెట్‌లో చక్కర్లు కొడుతున్నాయి. 'టాప్ గన్: మావెరిక్' దర్శకుడు జోసెఫ్ కోసిన్స్కీ దర్శకత్వం వహించిన 'F1' చిత్రం ఫార్ములా వన్ రేసింగ్ ప్రపంచం ఆధారంగా తెరకెక్కిన క్రీడా యాక్షన్ డ్రామా.

ఇదిలావుండగా, ప్రభాస్ మరియు ప్రశాంత్ నీల్ కాంబినేషన్‌లో వచ్చిన 'సలార్: పార్ట్ 1 – సీజ్‌ఫైర్' డిసెంబర్ 2023లో విడుదలై బాక్సాఫీస్ వద్ద భారీ విజయం సాధించింది. ఈ చిత్రం ప్రపంచవ్యాప్తంగా రూ.617 కోట్లకు పైగా వసూలు చేసింది. ప్రస్తుతం 'సలార్ పార్ట్ 2: శౌర్యాంగ పర్వం' కోసం అభిమానులు ఆతృతగా ఎదురుచూస్తున్నారు. అయితే, ప్రభాస్ మరియు ప్రశాంత్ నీల్ ఇద్దరూ తమ తదుపరి ప్రాజెక్ట్‌లతో బిజీగా ఉన్నారు. ప్రభాస్ త్వరలో మారుతి దర్శకత్వంలో 'ది రాజా సాబ్' చిత్రంతో రాబోతుండగా, ప్రశాంత్ నీల్ జూనియర్ ఎన్టీఆర్‌తో కలిసి 'డ్రాగన్' అనే చిత్రానికి దర్శకత్వం వహించనున్నారు.