ట్రంప్ మరో సంచలన నిర్ణయం... ఈసారి యూరప్ దేశాలే టార్గెట్!

అమెరికా అధ్యక్షుడు డొనాల్డ్ ట్రంప్ యూరోపియన్ యూనియన్ (ఈయూ) మరియు మెక్సికో నుంచి దిగుమతి అయ్యే అన్ని వస్తువులపై ఈ ఏడాది ఆగస్టు 1 నుంచి 30 శాతం సుంకాలు విధిస్తున్నట్లు ప్రకటించారు. ఈ నిర్ణయం వాణిజ్య ఒప్పందాలలో సమతుల్యత సాధించేందుకు మరియు అమెరికా ఆర్థిక ప్రయోజనాలను కాపాడేందుకు తీసుకున్న చర్యగా ట్రంప్ వెల్లడించారు. ఈ ప్రకటన శనివారం నాడు ఆయన తన సొంత సోషల్ మీడియా ప్లాట్‌ఫామ్ ట్రూత్ సోషల్‌లో లేఖ రూపంలో విడుదల చేశారు.

ట్రంప్ తన లేఖలో, మెక్సికో డ్రగ్ ట్రాఫికింగ్ నియంత్రణలో విఫలమైందని, ముఖ్యంగా ఫెంటానిల్ సంక్షోభానికి కారణమైన కార్టెల్స్‌ను అరికట్టడంలో నిర్లక్ష్యం చేసిందని ఆరోపించారు. అలాగే, యూరోపియన్ యూనియన్‌తో వాణిజ్య సంబంధాలు సమానత్వ ప్రాతిపదికన లేవని, దీర్ఘకాలంగా వాణిజ్య లోటు ఉందని, ఇయూ యొక్క సుంకాలు మరియు వాణిజ్య అడ్డంకులు దీనికి కారణమని పేర్కొన్నారు. తాజాగా తాను విధించిన సుంకాలు ఇప్పటికే ఉన్న స్టీల్ వంటి రంగాలకు సంబంధించిన లెవీలకు అదనం అని వివరించారు.

అమెరికాతో వాణిజ్య ఒప్పందాలపై చర్చలు జరుపుతున్న ఈయూ, మెక్సికో దేశాలకు ఆగస్టు 1 వరకు గడువు ఇస్తామని, ఒప్పందాలు కుదిరితే సుంకాల రేట్లు తగ్గే అవకాశం ఉందని ట్రంప్ సూచించారు. అయితే, ఈ దేశాలు ప్రతీకార సుంకాలు విధిస్తే మరింత ఎక్కువ సుంకాలు విధిస్తామని హెచ్చరించారు. 

ఈయూ అధ్యక్షురాలు ఉర్సులా వాన్ డెర్ లేయెన్ ఈ సుంకాలు వాణిజ్య యుద్ధానికి దారితీస్తాయని ఆందోళన వ్యక్తం చేస్తూ, ఆగస్టు 1 లోపు ఒప్పందం కుదుర్చుకునేందుకు సిద్ధంగా ఉన్నామని తెలిపారు. 

ఈ సుంకాలు అమెరికా వినియోగదారులు, వ్యాపారాలపై ప్రభావం చూపే అవకాశం ఉందని ఆర్థిక నిపుణులు హెచ్చరిస్తున్నారు. గతంలో ట్రంప్ విధించిన సుంకాలు ఆర్థిక మార్కెట్లలో అలజడి సృష్టించాయి.