కడుపునొప్పితో లీవ్ పెడితే.. వర్క్ ఫ్రమ్ హోమ్ చేయమన్న బాస్!

అనారోగ్యంతో సెలవు పెట్టినప్పటికీ ఇంటి నుంచి పని చేయాలంటూ ఓ బాస్ తన ఉద్యోగిపై ఒత్తిడి తెచ్చిన ఘటన సోషల్ మీడియాలో తీవ్ర దుమారం రేపుతోంది. బాధితుడు తనకు, బాస్‌కు మధ్య జరిగిన వాట్సాప్ సంభాషణ స్క్రీన్‌షాట్‌ను రెడిట్‌లో పోస్ట్ చేయడంతో ఈ విషయం వెలుగులోకి వచ్చింది. చిన్న కంపెనీలలో పని సంస్కృతి ఎంత దారుణంగా ఉందో ఈ ఘటన అద్దం పడుతోందని నెటిజన్లు మండిపడుతున్నారు.

ఓ చిన్న కంపెనీలో మార్కెటింగ్ కోఆర్డినేటర్‌గా పనిచేస్తున్న ఉద్యోగి తీవ్రమైన కడుపునొప్పితో బాధపడుతూ తన బాస్‌కు వాట్సాప్‌లో సెలవు కోసం మెసేజ్ చేశాడు. అయితే, ఆ బాస్ సెలవు మంజూరు చేయకుండా "ఇంటి నుంచే పని చేసి క్లయింట్లతో కోఆర్డినేట్ చేయగలవా?" అని అడిగారు. దీంతో తీవ్ర మనస్తాపానికి గురైన ఉద్యోగి, ఈ చాట్‌ను సోషల్ మీడియాలో పంచుకుని తన ఆవేదన వ్యక్తం చేశారు.

"గత 6-7 నెలలుగా ఈ కంపెనీలో పనిచేస్తున్నాను. నేను చాలా అరుదుగా సెలవులు తీసుకుంటాను. ఆఫీసు నుంచి పనిచేసేది నేను, మరొకరు మాత్రమే. అయినా అనారోగ్యంతో ఉన్నప్పుడు కూడా ఇలా ఒత్తిడి చేస్తున్నారు. పైగా, కంపెనీ అందించాల్సిన ల్యాప్‌టాప్ బదులు నా సొంత ల్యాప్‌టాప్‌నే పనికి వాడుతున్నాను" అని ఆ ఉద్యోగి వాపోయాడు. తక్కువ జీతానికి ఎక్కువ పని చేయించుకుంటూ, కంపెనీ యజమానిలా పనిచేయాలని ఆశిస్తున్నాడని ఆయన ఆరోపించారు.

ఈ పోస్ట్‌పై నెటిజన్ల నుంచి పెద్ద ఎత్తున స్పందన వస్తోంది. "25 ఏళ్ల కంపెనీలో కేవలం ఇద్దరే ఉద్యోగులా? ఇదేం వృద్ధి?" అని ఒకరు ప్రశ్నించగా, "ఇలాంటి స్టార్టప్‌లలో అస్సలు చేరకూడదు" అని మరొకరు కామెంట్ చేశారు. అనారోగ్యం పాలైన ఉద్యోగుల పట్ల యాజమాన్యాలు మానవత్వంతో ప్రవర్తించాలని పలువురు సూచిస్తున్నారు.