Balakrishna: ఈరోజు నా హృదయం కృతజ్ఞతతో నిండిపోయింది: బాలకృష్ణ

తన జన్మదినం (జూన్ 10) సందర్భంగా అభిమానులు, నాయకులు, కార్యకర్తలు రెండు తెలుగు రాష్ట్రాల్లో ఎంతో ఉత్సాహంగా నిర్వహించిన సేవా కార్యక్రమాల పట్ల ప్రముఖ సినీ నటుడు, హిందూపురం శాసనసభ్యుడు నందమూరి బాలకృష్ణ హృదయపూర్వక కృతజ్ఞతలు తెలిపారు. ఈ మేరకు ఆయన మంగళవారం ఒక ప్రకటన విడుదల చేశారు. అభిమానులు చూపిన ప్రేమ, అభిమానం, ఆశీస్సులు తన జీవితానికి మరింత అర్థాన్ని ఇచ్చాయని ఆయన పేర్కొన్నారు.

తన పుట్టినరోజును పురస్కరించుకుని గ్రామ గ్రామాన, మండల కేంద్రాల్లో అన్నదానాలు, రక్తదాన శిబిరాలు వంటి ఎన్నో సేవా కార్యక్రమాలు నిర్వహించిన ప్రతి ఒక్కరికీ పేరుపేరునా ధన్యవాదాలు తెలియజేశారు. "ఈరోజు నా హృదయం కృతజ్ఞతతో నిండిపోయింది. మీరు చూపిన ప్రేమ, అభిమానం, ఆశీస్సులు నా జీవితానికి మరింత అర్థం ఇచ్చాయి," అని బాలకృష్ణ తన సందేశంలో పేర్కొన్నారు.

ముఖ్యంగా, బసవతారకం ఇండో అమెరికన్ క్యాన్సర్ హాస్పిటల్ & రీసెర్చ్ ఇన్ స్టిట్యూట్‌లో తన అభిమానులు స్వయంగా ఏర్పాటు చేసిన రక్తదాన శిబిరాన్ని బాలకృష్ణ ప్రత్యేకంగా ప్రశంసించారు. "రక్తదానం అనేది జీవితాన్నే ఇచ్చే గొప్ప దానం. మీ ప్రేమ కేవలం మాటల్లో కాదు... ఆచరణలో, సేవలో, మానవత్వంలో చూపించటమే నాకు గొప్ప గర్వకారణం. నిజమైన అభిమానం అంటే ఇదే!" అంటూ అభిమానుల సేవానిరతిని కొనియాడారు.

ఒకటి రెండు కాదు, ఎన్నో జీవితాలకు వెలుగునిచ్చే మంచి పనులు చేయడం అభిమానుల విశాల హృదయానికి నిదర్శనమని బాలకృష్ణ అన్నారు. ఈరోజు తనను ఆశీర్వదించిన ప్రతి ఒక్కరికీ, ఈ సేవా కార్యక్రమాలలో పాల్గొన్న ప్రతి సహృదయుడికి హృదయపూర్వక ధన్యవాదాలు తెలుపుకుంటున్నానని పేర్కొన్నారు. అభిమానుల ప్రేమ, మద్దతు తనకు జీవితాంతం స్ఫూర్తిగా నిలుస్తాయని, వారితో కలిసి మరిన్ని సేవా కార్యక్రమాలు చేయాలనే ఉత్సాహాన్ని తనలో నింపారని ఆయన వివరించారు. ఈ రోజును తన జీవితంలోని మరపురాని రోజుగా మార్చిన ప్రతి ఒక్కరికీ బాలకృష్ణ మరోసారి ధన్యవాదాలు తెలియజేశారు.