Google: అమరావతిలో గూగుల్ భారీ ప్రాజెక్టు.. ప్రభుత్వంతో ఉన్నతస్థాయి చర్చలు
- అమరావతిలో కార్యకలాపాలు ప్రారంభించనున్న గూగుల్
- రాష్ట్ర ప్రభుత్వంతో కొనసాగుతున్న ఉన్నతస్థాయి సంప్రదింపులు
- నెక్కల్లు వద్ద 143 ఎకరాల స్థలాన్ని పరిశీలించిన ప్రతినిధులు
- సీఆర్డీఏ అధికారులతో కలిసి పర్యటన
- విమానాశ్రయం, రైల్వేస్టేషన్‌కు దగ్గరగా ఉండటంతో స్థలంపై మొగ్గు
ఆంధ్రప్రదేశ్ రాజధాని అమరావతిలో ప్రపంచ ప్రఖ్యాత టెక్నాలజీ సంస్థ గూగుల్ తన కార్యకలాపాలను ప్రారంభించేందుకు ఆసక్తి చూపుతోంది. ఇందులో భాగంగా సంస్థ ప్రతినిధులు రాష్ట్ర ప్రభుత్వ అధికారులతో ఉన్నత స్థాయిలో చర్చలు జరుపుతున్నట్లు విశ్వసనీయ వర్గాల ద్వారా తెలిసింది. గూగుల్ చేపట్టబోయే ఓ ప్రతిష్ఠాత్మక ప్రాజెక్టుకు అమరావతిని వేదికగా చేసుకోవాలని యోచిస్తున్నట్లు సమాచారం.
ఈ క్రమంలో గూగుల్ ప్రతినిధుల బృందం, ఏపీ సీఆర్డీఏ (రాజధాని ప్రాంత అభివృద్ధి ప్రాధికార సంస్థ) అధికారులతో కలిసి శుక్రవారం రాజధాని ప్రాంతంలో పర్యటించింది. తుళ్లూరు మండలంలోని అనంతవరం, నెక్కల్లు గ్రామాల మధ్య ఉన్న ఈ-8 రహదారికి సమీపంలో ఉన్న భూములను వారు పరిశీలించారు. సర్వే నంబర్లు 10, 12, 13, 15, 16 పరిధిలోని సుమారు 143 ఎకరాల విశాలమైన భూమిని గూగుల్ ప్రాజెక్టు కోసం కేటాయించేందుకు రాష్ట్ర ప్రభుత్వం కూడా సుముఖంగా ఉన్నట్లు తెలుస్తోంది.
గూగుల్ ప్రతినిధులు పరిశీలించిన ఈ స్థలానికి పలు అనుకూలతలు ఉన్నాయని అధికారులు చెబుతున్నారు. ముఖ్యంగా, భవిష్యత్తులో నిర్మించ తలపెట్టిన అంతర్జాతీయ విమానాశ్రయం, ప్రధాన రైల్వేస్టేషన్ ఈ ప్రాంతానికి దగ్గరగా రానున్నాయి. ఈ రవాణా సౌకర్యాల సామీప్యత కారణంగానే గూగుల్ ప్రతినిధులు ఈ నిర్దిష్ట స్థలం వైపు మొగ్గు చూపుతున్నట్లు సమాచారం. ఈ అంశాలన్నీ గూగుల్ తమ ప్రాజెక్టును ఇక్కడ స్థాపించడానికి సానుకూలంగా దోహదపడతాయని భావిస్తున్నారు. ప్రస్తుతం చర్చలు కొనసాగుతుండగా, త్వరలోనే దీనిపై అధికారిక ప్రకటన వెలువడే అవకాశం ఉందని తెలుస్తోంది.
