Zepto: జెప్టో డార్క్‌స్టోర్‌లో ఫంగస్, గడువు తీరిన ఉత్పత్తులు.. లైసెన్స్ సస్పెన్షన్
- ముంబై ధారవిలోని జెప్టో గిడ్డంగి లైసెన్స్ సస్పెన్షన్
- ఆహార పదార్థాలపై ఫంగస్, కోల్డ్ స్టోరేజ్ లోపాలున్నట్టు ఎఫ్‌డీఏ తనిఖీలో వెల్లడి
- రాష్ట్రంలోని అన్ని క్విక్ కామర్స్ సంస్థల తనిఖీలకు ప్రభుత్వ ఆదేశం
- ఢిల్లీలోని జెప్టో గోడౌన్‌లోనూ అపరిశుభ్ర వాతావరణం!
- గతంలోనూ డార్క్ ప్యాటర్న్స్, నాణ్యత లోపాలపై జెప్టోకు నోటీసులు
వేగవంతమైన డెలివరీలతో దూసుకుపోతున్న క్విక్ కామర్స్ దిగ్గజం జెప్టోకు మహారాష్ట్రలో ఊహించని షాక్ తగిలింది. ఆహార భద్రతా ప్రమాణాలను గాలికొదిలేసిందన్న ఆరోపణలతో ముంబైలోని ధారావి ప్రాంతంలో ఉన్న జెప్టో గోడౌన్ లైసెన్స్‌ను మహారాష్ట్ర ఫుడ్ అండ్ డ్రగ్ అడ్మినిస్ట్రేషన్ (ఎఫ్‌డీఏ) సస్పెండ్ చేసింది. కిరాన్‌కార్ట్ టెక్నాలజీస్ ప్రైవేట్ లిమిటెడ్ యాజమాన్యంలోని ఈ సంస్థ వినియోగదారులకు నిమిషాల్లో సరుకులు అందిస్తామని చెబుతున్నప్పటికీ, నాణ్యత విషయంలో తీవ్రమైన లోపాలున్నట్లు ఎఫ్‌డీఏ తనిఖీల్లో వెల్లడైంది.
ఎఫ్‌డీఏ అధికారులు ధారావిలోని జెప్టో వేర్‌హౌస్‌లో జరిపిన తనిఖీల్లో పలు ఆందోళనకర విషయాలు వెలుగులోకి వచ్చాయి. ఆహార పదార్థాలపై ఫంగస్ ఉండటాన్ని గుర్తించారు. పాలు, పాల ఉత్పత్తులను నిల్వ చేయాల్సిన 0 నుంచి 4 డిగ్రీల సెల్సియస్ ఉష్ణోగ్రత, అలాగే ఫ్రోజెన్ ఐటమ్స్‌ను ఉంచాల్సిన మైనస్ 18 డిగ్రీల సెల్సియస్ ఉష్ణోగ్రత ప్రమాణాలను పాటించడం లేదని తేలింది. గడువు ముగిసిన ఉత్పత్తులు, వినియోగానికి సిద్ధంగా ఉన్న వస్తువులను వేరువేరుగా ఉంచడంలోనూ నిర్లక్ష్యం కనిపించింది. ఇది ఆహార భద్రత, ప్రమాణాల చట్టం, 2006ను ఉల్లంఘించడమేనని అధికారులు స్పష్టం చేశారు. ఢిల్లీలోని మయూర్ విహార్ ఫేజ్ 1లోని జెప్టో గోడౌన్‌లో ఆహార పదార్థాలు నిల్వ ఉంచిన ప్రదేశానికి అత్యంత సమీపంలో దుర్వాసన వెదజల్లే వాష్‌రూమ్ ఉన్నప్పటికీ, కార్యకలాపాలు యథావిధిగా కొనసాగినట్లు కూడా ఆరోపణలున్నాయి.
ఈ ఘటనపై స్పందించిన రాష్ట్ర ఎఫ్‌డీఏ శాఖ మంత్రి యోగేష్ కదమ్ కేవలం జెప్టోకే పరిమితం కాకుండా రాష్ట్రంలోని బ్లింకిట్, ఇన్‌స్టామార్ట్ వంటి అన్ని క్విక్ కామర్స్ సంస్థల గోడౌన్లలోనూ తనిఖీలు నిర్వహించాలని ఆదేశించారు. వేగం పేరుతో భద్రతను పణంగా పెట్టకూడదని ఆయన స్పష్టం చేశారు. ఇది క్విక్ కామర్స్ రంగంలో కోల్డ్ చైన్ నిర్వహణలోని లోపాలను బహిర్గతం చేసింది.
పండ్లు, కూరగాయలు, పాలు, మాంసం వంటి త్వరగా పాడైపోయే వస్తువులకు సరైన ఉష్ణోగ్రత నియంత్రణ చాలా ముఖ్యం. అయితే, జెప్టో వంటి సంస్థలు వేగంగా విస్తరించడం, ఖర్చు తగ్గించుకోవడం వంటి ఒత్తిళ్ల మధ్య కోల్డ్ చైన్ నిర్వహణలో రాజీ పడుతున్నాయన్న విమర్శలున్నాయి. దేశంలో కేవలం 4-6 శాతం పాడైపోయే ఉత్పత్తులు మాత్రమే ఆధునిక కోల్డ్ చైన్ వ్యవస్థల ద్వారా సరఫరా అవుతుండగా, అమెరికా, సింగపూర్ వంటి దేశాల్లో ఇది 70-80 శాతంగా ఉంది. సరఫరా ప్రారంభం నుంచి చివరి మైలు డెలివరీ వరకు ప్రతి దశలోనూ కోల్డ్ చైన్ వ్యవస్థను పటిష్టం చేయాల్సిన అవసరం ఉందని నిపుణులు సూచిస్తున్నారు.
గతంలోనూ జెప్టోపై డెలివరీలలో తీవ్ర జాప్యం, గడువు ముగిసిన వస్తువులు పంపడం, ధరల విషయంలో అవకతవకలు, వినియోగదారులను తప్పుదోవ పట్టించే ‘డార్క్ ప్యాటర్న్స్’ వినియోగం వంటి పలు ఆరోపణలు వచ్చాయి. బెంగళూరులో ఓ డెలివరీ ఎగ్జిక్యూటివ్ తప్పుడు చిరునామా కారణంగా కస్టమర్‌పై దాడి చేసిన ఘటన, సంస్థలో పని వాతావరణం సరిగా లేదంటూ వచ్చిన ఆరోపణలు కూడా జెప్టో ప్రతిష్టను దెబ్బతీశాయి. తాజా ఘటనతో క్విక్ కామర్స్ సంస్థల ఆహార భద్రతా ప్రమాణాలపై వినియోగదారుల్లో ఆందోళనలు మరింత పెరిగాయి. వేగవంతమైన సేవలతో పాటు నాణ్యమైన, సురక్షితమైన ఉత్పత్తులను అందించడంపై సంస్థలు దృష్టి సారించాలని ఈ ఉదంతం స్పష్టం చేస్తోంది.
