Bandla Ganesh: నాకు చెడు అలవాట్లు రాకపోవడానికి ఆయనే కారణం: బండ్ల గణేశ్
- ఎస్వీ కృష్ణారెడ్డి పుట్టినరోజు వేడుకలో బండ్ల గణేశ్ ప్రసంగం
- తనను నటుడిగా పరిచయం చేసింది కృష్ణారెడ్డేనన్న గణేశ్
- నా జీవితాన్ని ఎలా నడవాలో నేర్పిన మహానుభావుడు అంటూ ప్రశంస
- ఎస్వీ కృష్ణారెడ్డి మళ్ళీ సినిమాలు తీయాలని కోరిన బండ్ల
- ఆయన సినిమాలు, కథాంశాలను కొనియాడిన వైనం
- తొలి పారితోషికం జ్ఞాపకాలను పంచుకున్న బండ్ల గణేశ్
ప్రముఖ దర్శకులు ఎస్వీ కృష్ణారెడ్డి జన్మదిన వేడుకలు ఘనంగా జరిగాయి. ఈ కార్యక్రమానికి హాజరైన నటుడు, నిర్మాత బండ్ల గణేశ్, ఎస్వీ కృష్ణారెడ్డిపై ప్రశంసల వర్షం కురిపించారు. ఆయనతో తనకున్న అనుబంధాన్ని గుర్తుచేసుకుంటూ తీవ్ర భావోద్వేగానికి గురయ్యారు. "నా జీవితంలో ఈ రోజు నేను ఈ స్థాయిలో ఉన్నానంటే దానికి కారణం మా గురువుగారు ఎస్వీ కృష్ణారెడ్డి. ఆయన నా తండ్రి లాంటి వారు," అంటూ తన ప్రసంగాన్ని ప్రారంభించారు.
చిన్నప్పటి నుంచి సినిమా రంగంలోకి ప్రవేశించాలనే కోరిక బలంగా ఉండేదని, ఎన్నో ప్రయత్నాల తర్వాత ఇండస్ట్రీలో నిలదొక్కుకోవడానికి కష్టపడుతున్న సమయంలో ఎస్వీ కృష్ణారెడ్డి పరిచయమయ్యారని బండ్ల గణేశ్ తెలిపారు. "నేను షాద్‌నగర్ వెళ్ళిపోయి వ్యాపారం చేసుకుందాం అనుకుంటున్న సమయంలో, నా మిత్రుడు శ్రీకాంత్ నన్ను షిరిడీ తీసుకెళ్ళాడు. అక్కడ దర్శనం చేసుకుని వస్తుండగా కృష్ణారెడ్డి గారు, అచ్చిరెడ్డి గారు కలిసి 'గణేశ్ నీకు వేషం ఇస్తాం, నువ్వు ఉండు' అని చెప్పారు" అని ఆనాటి సంఘటనను గుర్తుచేసుకున్నారు.
"నాకు నటన రాకపోయినా, 'వినోదం' సినిమా ద్వారా నన్ను నటుడిగా పరిచయం చేశారు. ఆ సినిమాతో నాకు ఇండస్ట్రీలో నిలబడగలననే నమ్మకం వచ్చింది. ఆ తర్వాత పవన్ కల్యాణ్ గారు నన్ను నిర్మాతను చేశారు. నా జీవితం ఊహించని విధంగా సాగుతోంది" అని బండ్ల గణేశ్ వివరించారు. తనకు ఎలాంటి చెడు అలవాట్లు రాకుండా ఉండటానికి కారణం ఎస్వీ కృష్ణారెడ్డి అని, ప్రతిరోజూ ఉదయం 5 గంటలకు తన ఇంటికి తీసుకెళ్ళి కేబీఆర్ పార్కులో వాకింగ్ చేస్తూ జీవితంలో ఎలా నడుచుకోవాలో, ఇండస్ట్రీలో ఎవరితో ఉండకూడదో నేర్పిన మహానుభావుడని కొనియాడారు.
ఎస్వీ కృష్ణారెడ్డి సంగీత పరిజ్ఞానం కేవీ రెడ్డి గారి స్థాయిలో ఉంటుందని, ఆయన దర్శకత్వంలో వచ్చిన 'వినోదం', 'శుభలగ్నం', 'ఆహ్వానం' వంటి చిత్రాలు తెలుగు చలనచిత్ర రంగానికి కొత్త కథలను అందించాయని బండ్ల గణేశ్ అన్నారు. "ఆయన 'వినోదం' చిత్రంలో హీరో విలన్ ఇంటికి వెళ్లి, విలన్‌ను కామెడీ చేసి వాళ్ల కూతురిని పెళ్లి చేసుకునే కాన్సెప్ట్‌ను శ్రీను వైట్ల లాంటి వాళ్లు పట్టుకుని, దాన్నే మార్చుకుని దశాబ్దం పాటు కోట్లు సంపాదించారు. 'ఆహ్వానం' సినిమాలో పెళ్లే వేడుక కాదు, విడిపోవడం కూడా ఒక వేడుకే అని చెప్పిన గొప్ప వ్యక్తి ఆయన" అని తెలిపారు. ఎస్వీ కృష్ణారెడ్డి ఎప్పుడూ 'యు' సర్టిఫికెట్ చిత్రాలనే తీసి, కలకాలం నిలబడే విజయాలు సాధించారని ప్రశంసించారు.
ఈ సందర్భంగా ఎస్వీ కృష్ణారెడ్డి మళ్ళీ చిత్ర పరిశ్రమకు వచ్చి సినిమాలు తీయాలని బండ్ల గణేశ్ గట్టిగా కోరారు. "సార్, మీరు సినిమాలు తీయండి. మీ అంత గొప్ప డైరెక్టర్ తెలుగు ఇండస్ట్రీలో లేరు. 'వినోదం' సినిమాను 80-90 రోజుల్లో పూర్తి చేసి విడుదల చేశారు. మీ స్ఫూర్తితో నేను కూడా 'ఆంధ్రావాలా' చిత్రాన్ని 102 రోజుల్లో విడుదల చేశాను. హిట్ ఫ్లాపులు మన చేతిలో లేవు, సినిమా త్వరగా తీసి జనాలకు అందించాలి" అని అన్నారు. సంవత్సరాలు తరబడి సినిమాలు తీయడం వల్ల థియేటర్ల మనుగడ కష్టమవుతోందని, ఒక ఎగ్జిబిటర్‌గా, థియేటర్ ఓనర్‌గా తాను ఈ విషయం చెబుతున్నానని అన్నారు. ఎస్వీ కృష్ణారెడ్డి వంటి దర్శకులు సంవత్సరానికి ఐదు సినిమాలు తీయాలని ఆకాంక్షించారు.
ఎస్వీ కృష్ణారెడ్డి ఎంతో మంది నటీనటులకు జీవితాన్నిచ్చారని, శ్రీకాంత్, జేడీ చక్రవర్తి, వరుస ఫ్లాపుల్లో ఉన్న జగపతి బాబుకు 'శుభలగ్నం' వంటి చిత్రంతో స్టార్‌డమ్ ఇచ్చారని గుర్తుచేశారు. బ్రహ్మానందం, కోట శ్రీనివాసరావు, బాబు మోహన్ వంటి ఎంతో మంది జీవితాలను నిలబెట్టారని అన్నారు. "మేము తినే ప్రతి అన్నం మెతుకు మీద ఎస్వీ కృష్ణారెడ్డి గారి పేరు ఉంది. ఆయన రుణం జన్మజన్మలకూ తీర్చుకోలేనిది" అంటూ బండ్ల గణేశ్ తీవ్ర భావోద్వేగానికి లోనయ్యారు.
'వినోదం' సినిమాకు గానూ అచ్చిరెడ్డి గారు తనకు పదివేల రూపాయల నగదు, ఒక నవరత్నాల ఉంగరం ఇచ్చారని, ఆ డబ్బు, ఉంగరం ఇప్పటికీ బీరువాలో భద్రంగా దాచుకున్నానని బండ్ల గణేశ్ తెలిపారు. మనీషా ఫిలిమ్స్ సంస్థలో పనిచేయడం ఒకప్పుడు సెంట్రల్ గవర్నమెంట్ ఉద్యోగికి ఉన్నంత గౌరవాన్ని ఇచ్చిందని, ఆ సంస్థలో క్రమశిక్షణ, ఆప్యాయతలు వెల్లివిరిసేవని ఆయన గుర్తుచేసుకున్నారు. తన గురువు ఎస్వీ కృష్ణారెడ్డి ఇలాంటి పుట్టినరోజులు మరెన్నో జరుపుకోవాలని మనస్ఫూర్తిగా కోరుకుంటున్నట్లు బండ్ల గణేశ్ తన ప్రసంగాన్ని ముగించారు.
