Arunachalam: అరుణాచలంలో గిరి ప్రదక్షిణ వేళ భక్తుల బాహాబాహీ... వీడియో ఇదిగో!

తమిళనాడులోని ప్రసిద్ధ పుణ్యక్షేత్రమైన అరుణాచలంలో ఈ ఉదయం భక్తుల మధ్య తీవ్ర ఘర్షణ చోటుచేసుకుంది. గిరి ప్రదక్షిణ చేసేందుకు వచ్చిన భక్తులు భారీగా తరలిరావడంతో క్యూ లైన్లలో తోపులాట జరిగింది. ఈ క్రమంలోనే మొదలైన చిన్నపాటి వాగ్వాదం కాస్తా పెద్దదై, భక్తులు ఒకరిపై ఒకరు పిడిగుద్దులు గుద్దుకునే వరకు వెళ్లింది. ఈ ఘటనలో పలువురు భక్తులకు గాయాలయ్యాయి.

వివరాల్లోకి వెళితే, అరుణాచలంలో ఆదివారం కావడంతో గిరి ప్రదక్షిణ చేసేందుకు భక్తులు పెద్ద సంఖ్యలో పోటెత్తారు. దీంతో గిరి ప్రదక్షిణ మార్గంలోని క్యూ లైన్లు కిలోమీటర్ల మేర నిండిపోయాయి. సుమారు 3 కిలోమీటర్లకు పైగా క్యూ లైన్ ఉండటంతో గంటల తరబడి నిరీక్షించాల్సి రావడంతో భక్తుల్లో తీవ్ర అసహనం నెలకొంది. ఈ సమయంలో క్యూ లైన్లో ముందుకు వెళ్లే క్రమంలో భక్తుల మధ్య తోపులాట ప్రారంభమైంది.

ఈ తోపులాట కాస్తా మాటామాటా పెరిగి ఘర్షణకు దారితీసింది. కొందరు భక్తులు సహనం కోల్పోయి ఒకరినొకరు నెట్టుకున్నారు. పరిస్థితి మరింత ఉద్రిక్తంగా మారి, ఒకరిపై ఒకరు దాడి చేసుకున్నారు. ఈ దాడిలో కొంతమంది భక్తులకు గాయాలయ్యాయి. గాయపడిన వారిని చికిత్స నిమిత్తం సమీపంలోని ఆసుపత్రికి తరలించారు. ఈ ఘటనతో గిరి ప్రదక్షిణ మార్గంలో కొంతసేపు ఉద్రిక్త వాతావరణం నెలకొంది. భక్తులు భారీగా తరలివస్తున్నప్పటికీ, తగిన ఏర్పాట్లు చేయడంలో అధికారులు విఫలమయ్యారని పలువురు ఆరోపిస్తున్నారు.