Dassault Aviation: మన రఫేల్ విమానాల దెబ్బ... డసో ఏవియేషన్ షేర్ల ధరకు రెక్కలు
- ఇటీవల పాక్ పై భారత్ ఆపరేషన్ సిందూర్
- గగనతలంలో సంపూర్ణ ఆధిపత్యం చెలాయించిన భారత రఫేల్ జెట్ ఫైటర్లు
- రఫేల్ జెట్లను తయారుచేస్తున్న ఫ్రెంచ్ సంస్థ డసో ఏవియేషన్
- స్టాక్ మార్కెట్ లో డసో షేరు దూకుడు
- ఆల్ టైమ్ హైకి 10 శాతం దూరంలో డసో షేరు వాల్యూ
ఫ్రాన్స్‌కు చెందిన ప్రముఖ రక్షణ రంగ సంస్థ, రఫేల్ యుద్ధ విమానాల తయారీదారు డసో ఏవియేషన్ షేర్లు పారిస్ స్టాక్ ఎక్స్ఛేంజ్‌లో పరుగులు పెడుతున్నాయి. గురువారం ఉదయం ట్రేడింగ్‌లో ఈ షేరు ధర ఇంట్రాడేలో 306.40 యూరోల గరిష్ఠ స్థాయికి చేరింది. ఇది సంస్థ జీవితకాల గరిష్ఠమైన 332.20 యూరోలకు కేవలం 10 శాతం దూరంలోనే ఉండటం విశేషం. భారత వైమానిక దళం చేపట్టిన ఆపరేషన్ సిందూర్ ఫలితంగానే సంస్థ షేర్ల ధరలకు రెక్కలొచ్చాయని విశ్లేషకులు భావిస్తున్నారు.
డసో ఏవియేషన్ షేరు ధర వరుసగా మూడో సెషన్లోనూ సానుకూలంగా ట్రేడవుతూ, గురువారం దాదాపు 2% వృద్ధిని నమోదు చేసింది. సోమవారం ఈ షేరు 7 శాతానికి పైగా నష్టపోయినప్పటికీ, మంగళవారం నాడు 3 శాతానికి పైగా కోలుకుంది.
మే 7న భారత వైమానిక దళం (IAF) పాకిస్థాన్ భూభాగంలో సుమారు 200 కిలోమీటర్ల దూరంలోని ఉగ్రవాద స్థావరాలపై 'ఆపరేషన్ సిందూర్' పేరిట కచ్చితమైన దాడులు నిర్వహించిన తర్వాత డసో ఏవియేషన్ స్టాక్ గణనీయంగా పెరిగింది. ఈ ఆపరేషన్‌లో స్కాల్ప్ క్రూయిజ్ క్షిపణులు, హ్యామర్ ఆయుధాలతో కూడిన రఫేల్ యుద్ధ విమానాలను ఉపయోగించారని, పాకిస్థాన్ గగనతలాన్ని ఉల్లంఘించకుండానే ఈ ఆపరేషన్‌ను విజయవంతంగా పూర్తి చేశారని నివేదికలు సూచిస్తున్నాయి. ఇది రఫేల్ యుద్ధ విమానాల సత్తాకు నిదర్శనం.
భారత్ ఇంత కచ్చితత్వంతో ఎలా దాడులు చేసిందన్నది పాక్ కు ఇప్పటికీ అంతుపట్టని విషయం. పాక్ ఆక్రమిత కశ్మీర్ (PoK) సహా పాకిస్థాన్‌లోని పలు ఉగ్రవాద శిబిరాలపై భారత వైమానిక దళం ఈ రఫేల్ యుద్ధ విమానాలను ప్రయోగించడం ఓ గేమ్ చేంజర్ అయింది. భారత రఫేల్ యుద్ధ విమానాలు ఎప్పుడు రంగంలోకి దిగాయో, ఎప్పుడు తిరిగి వెళ్లాయో కూడా తెలియని గందరగోళంలో పాక్ పడిపోయింది. ఆపరేషన్ సిందూర్ లో రఫేల్ యుద్ధ విమానాలు ఈ విధంగా ఆధిపత్యం చెలాయించడం ఆ విమానాల తయారీదారు డసో ఏవియేషన్ పేరు మార్మోగేలా చేసింది.
ఈ పరిణామాలపై రెలిగేర్ బ్రోకింగ్ ఎస్‌విపి - రిటైల్ రీసెర్చ్, రవి సింగ్ మాట్లాడుతూ, "2025 సంవత్సరం ప్రారంభం నుంచి, పెట్టుబడిదారుల విశ్వాసం మరియు రఫేల్ జెట్ ఎగుమతుల కారణంగా డసో ఏవియేషన్ షేరు 65% కంటే ఎక్కువ రాబడిని ఇచ్చింది. అదనంగా, భారత్ మరియు ఫ్రాన్స్ ఇటీవల 26 రఫేల్ యుద్ధ విమానాల నావల్ వేరియంట్ల సేకరణ కోసం ఒక పెద్ద రక్షణ ఒప్పందంపై సంతకం చేశాయి" అని తెలిపారు.
కంపెనీ బలమైన ఆర్థిక ఫలితాలు కూడా షేరు సానుకూల పనితీరుకు దోహదం చేస్తున్నాయి. డసో ఏవియేషన్ వార్షిక ఆదాయం 6.24 బిలియన్ యూరోలు కాగా, నికర లాభం 924 మిలియన్ యూరోలుగా నమోదైంది. గత ఏడాది కాలంలో ఫ్రెంచ్ ఏరోస్పేస్ & డిఫెన్స్ రంగం మొత్తం 17.7% వృద్ధి చెందింది.
ఆనంద్ రాఠీ సీనియర్ మేనేజర్ - టెక్నికల్ రీసెర్చ్, గణేష్ డోంగ్రే మాట్లాడుతూ, డసో ఏవియేషన్ షేరు ధర మంత్లీ చార్టులో బుల్లిష్ హ్యామర్ ప్యాటర్న్‌ను ఏర్పరుస్తోందని, ఇది బుల్స్‌కు అనుకూల సంకేతమని అన్నారు. "రఫేల్ బ్రాండ్ ఓనర్ కంపెనీ స్టాక్ 280 యూరోల జోన్ వద్ద డబుల్ బాటమ్ ప్యాటర్న్‌ను ఏర్పాటు చేసింది, ఇది ప్రస్తుతం డసో ఏవియేషన్ షేర్లకు కీలక మద్దతుగా పనిచేస్తోంది" అని వివరించారు.
