Air India: ఎయిర్ పోర్టులు తెరిచినా... విమాన సర్వీసులు రద్దు చేసిన ఎయిరిండియా, ఇండిగో
- గత రాత్రి సాంబా సెక్టార్లో డ్రోన్ల కలకలం
- దాంతో పలు ఎయిర్ పోర్టుల నుంచి తమ సర్వీసులు రద్దు చేసిన ఎయిర్ లైన్స్ సంస్థలు
- పరిస్థితిని గమనిస్తున్నామన్న ఎయిరిండియా, ఇండిగో
భారత-పాకిస్థాన్ సరిహద్దుల్లో డ్రోన్ల కలకలం మరోసారి విమాన సేవలకు తీవ్ర అంతరాయం కలిగించింది. సోమవారం రాత్రి జమ్మూకశ్మీర్‌లోని సాంబా సెక్టార్లో పాకిస్థానీ డ్రోన్ల కదలికలను భారత సైన్యం గుర్తించి, సమర్థవంతంగా తిప్పికొట్టిన నేపథ్యంలో, భద్రతా కారణాల దృష్ట్యా ఉత్తర భారతదేశంలోని పలు విమానాశ్రయాల నుంచి విమాన సర్వీసులను మంగళవారం (మే 13) నిలిపివేశారు. ఎయిర్ ఇండియా, ఇండిగో వంటి ప్రధాన విమానయాన సంస్థలు తమ సర్వీసులను రద్దు చేస్తున్నట్లు ప్రకటించాయి.
నిన్న రాత్రి సాంబా సెక్టార్లో భారత వైమానిక దళ నిఘా వ్యవస్థలు కొన్ని పాకిస్థానీ డ్రోన్లను గుర్తించాయి. వెంటనే అప్రమత్తమైన సైనిక దళాలు వాటిని అడ్డుకున్నాయి. ఈ క్రమంలో పెద్ద శబ్దాలు వినిపించాయని, ఆకాశంలో ఎర్రటి కాంతి చారలు కనిపించాయని స్థానిక కథనాలు వెల్లడించాయి. కొద్ది సంఖ్యలో డ్రోన్లు భారత భూభాగంలోకి ప్రవేశించే ప్రయత్నం చేయగా, వాటిని సమర్థవంతంగా తిప్పికొట్టామని ఆర్మీ అధికారులు ధృవీకరించారు. పరిస్థితి అదుపులోనే ఉందని, ఆందోళన చెందాల్సిన అవసరం లేదని వారు స్పష్టం చేశారు.
అయితే, ఈ డ్రోన్ల సంచారం భద్రతా వర్గాలను అప్రమత్తం చేసింది. ఈ సంఘటన జరిగిన కొద్ది గంటల్లోనే, ముందుజాగ్రత్త చర్యగా మంగళవారం ఉదయం నుంచి పలు విమాన సర్వీసులను రద్దు చేస్తున్నట్లు విమానయాన సంస్థలు ప్రకటించాయి.
ప్రయాణికుల భద్రత దృష్ట్యా, ఎయిర్ ఇండియా మంగళవారం నాడు జమ్మూ, లేహ్, జోధ్‌పూర్, అమృత్‌సర్, భుజ్, జామ్‌నగర్, చండీగఢ్, రాజ్‌కోట్‌లకు రాకపోకలు సాగించే విమానాలను రద్దు చేసినట్లు ఎక్స్ (పూర్వపు ట్విట్టర్) ద్వారా తెలిపింది. తదుపరి సమాచారం కోసం తమ సంప్రదింపుల కేంద్రాన్ని లేదా వెబ్‌సైట్‌ను సంప్రదించాలని ప్రయాణికులకు సూచించింది.
ప్రముఖ బడ్జెట్ విమానయాన సంస్థ ఇండిగో కూడా ఇదే బాటలో నడిచింది. జమ్మూ, అమృత్‌సర్, చండీగఢ్, లేహ్, శ్రీనగర్, రాజ్‌కోట్‌లకు మే 13న తమ విమాన సర్వీసులను రద్దు చేస్తున్నట్లు ప్రకటించింది. ప్రయాణికులకు కలిగిన అసౌకర్యానికి చింతిస్తున్నామని, పరిస్థితిని నిశితంగా గమనిస్తున్నామని పేర్కొంది.
భారత్-పాక్ మధ్య తీవ్ర ఉద్రిక్తతల నేపథ్యంలో గతంలో ఉత్తర, పశ్చిమ భారతదేశంలోని 32 విమానాశ్రయాలను తాత్కాలికంగా మూసివేసిన విషయం విదితమే. మూడు రోజుల పాటు కొనసాగిన ఈ మూసివేతను మే 15 వరకు పొడిగించిన అనంతరం, సోమవారం పౌర విమాన కార్యకలాపాలకు తిరిగి అనుమతి లభించింది. దీంతో ప్రయాణికులు ఊపిరి పీల్చుకున్నారు. అయితే, ఈ ఉపశమనం ఎంతోసేపు నిలవలేదు. సోమవారం రాత్రి సాంబా సెక్టార్లో పాకిస్థానీ డ్రోన్లు కలకలం రేపడంతో పరిస్థితి మళ్లీ మొదటికొచ్చింది. ఉత్తరాది ఎయిర్ పోర్టులకు విమాన సర్వీసులు నిలిచిపోయాయి.
