రూ. 2000 నోట్లు రద్దయి రెండేళ్లు.. ప్రజల వద్ద ఇంకా ఎన్ని ఉన్నాయంటే?

ఆర్బీఐ రూ.2000 కరెన్సీ నోట్లను ఉపసంహరించుకుంటున్నట్లు ప్రకటించి దాదాపు రెండేళ్లు పూర్తవుతున్నా, ఇంకా గణనీయమైన మొత్తంలో ఈ నోట్లు ప్రజల వద్దే ఉన్నట్లు వెల్లడైంది. ఏప్రిల్ 30 నాటికి రూ.6,266 కోట్ల విలువైన రూ.2000 నోట్లు ఇంకా బ్యాంకులకు తిరిగి రాలేదని ఆర్బీఐ తాజాగా ప్రకటించింది.

2023 మే 19న రూ.2000 నోట్లను ఉపసంహరించుకుంటున్నట్లు ఆర్బీఐ ప్రకటించిన విషయం విదితమే. ఆ సమయానికి దేశవ్యాప్తంగా రూ.3.56 లక్షల కోట్ల విలువైన రూ.2000 నోట్లు చలామణిలో ఉన్నాయి. నోట్ల మార్పిడికి, డిపాజిట్లకు ప్రజలకు తొలుత 2023 అక్టోబర్ 7 వరకు బ్యాంకుల్లో అవకాశం కల్పించారు.

ప్రస్తుతం, చలామణిలో ఉన్న మొత్తం రూ.2000 నోట్లలో 98.24 శాతం ఇప్పటికే బ్యాంకులకు తిరిగి వచ్చాయని ఆర్బీఐ పేర్కొంది. మిగిలిన సుమారు 1.76 శాతం నోట్లు, అంటే రూ.6,266 కోట్ల విలువైన నోట్లు ఇంకా ప్రజల వద్ద ఉన్నాయని తెలిపింది.

ఈ నోట్లను మార్చుకోవాలనుకునే వారు లేదా తమ ఖాతాల్లో జమ చేసుకోవాలనుకునే వారు దేశవ్యాప్తంగా ఉన్న 19 ఆర్బీఐ ప్రాంతీయ కార్యాలయాలను సంప్రదించవచ్చని సూచించింది. కార్యాలయాలకు వెళ్లలేని వారు, తమ వద్ద ఉన్న రూ.2000 నోట్లను పోస్టల్ శాఖ ద్వారా ఆర్బీఐ ప్రాంతీయ కార్యాలయాలకు పంపవచ్చని, వాటికి సమానమైన మొత్తాన్ని వారి బ్యాంకు ఖాతాల్లో జమ చేస్తామని ఆర్బీఐ స్పష్టం చేసింది.