సెంచరీ చేజార్చుకున్న గిల్... గుజరాత్ టైటాన్స్ భారీ స్కోరు

శుభ్ మన్ గిల్ నాయకత్వంలోని గుజరాత్ టైటాన్స్ ఐపీఎల్ తాజా సీజన్ లో మరో గెలుపుపై కన్నేసింది. ఇప్పటికే 7 మ్యాచ్ ల్లో 5 విజయాలతో టాప్ లో ఉన్న గుజరాత్ జట్టు నేడు కోల్ కతా నైట్ రైడర్స్ తో తలపడుతోంది. టాస్ ఓడి మొదట బ్యాటింగ్ కు దిగిన గుజరాత్ టైటాన్స్ నిర్ణీత 20 ఓవర్లలో 3 వికెట్లకు 198 పరుగులు చేసింది. 

కెప్టెన్ శుభ్ మన్ గిల్ అద్బుతంగా ఆడి 55 బంతుల్లో 10 ఫోర్లు, 3 సిక్సులతో 90 పరుగులు చేశాడు. 10 పరుగుల తేడాతో సెంచరీ చేజార్చుకున్నాడు. మరో ఓపెనర్ సాయి సుదర్శన్ తన ఫామ్ ను కంటిన్యూ చేస్తూ మరో అర్ధసెంచరీ నమోదు చేశాడు. సుదర్శన్ 36 బంతుల్లో 6 ఫోర్లు, 1 సిక్స్ తో 52 పరుగులు చేసి ఆండ్రీ రసెల్ బౌలింగ్ లో వెనుదిరిగాడు. 

వన్ డౌన్ లో వచ్చిన జోస్ బట్లర్ తన ట్రేడ్ మార్క్ షాట్లతో అలరించాడు. బట్లర్ 23 బంతుల్లో 8 ఫోర్లతో అజేయంగా 41 పరుగులు చేశాడు. రాహుల్ తెవాటియా (0) డకౌట్ అయ్యాడు. కోల్ కతా బౌలర్లలో వైభవ్ అరోరా 1, హర్షిత్ రాణా 1, ఆండ్రీ రసెల్ 1 వికెట్ తీశారు.