Raghurama Krishna Raju: ఉండిలో ఆక్వా రైతుల సమ్మేళనం... పాల్గొన్న రఘురామకృష్ణరాజు
- ఉండిలో ఆక్వా రైతుల సమ్మేళనం
- హాజరైన డిప్యూటీ స్పీకర్ రఘురామకృష్ణరాజు
- ఆక్వాకల్చర్ అభివృద్ధికి ప్రభుత్వం నిరంతరం కృషి చేస్తోందని వెల్లడి
ఉమ్మడి పశ్చిమ గోదావరి జిల్లాలోని ఉండిలో ఆక్వా రైతుల సమ్మేళనం జరిగింది. ఈ సమావేశంలో ఆక్వా రైతులు ఎదుర్కొంటున్న సమస్యలపై విస్తృతంగా చర్చించారు. ముఖ్యంగా ట్రంప్ సుంకాల కారణంగా వస్తున్న ఇబ్బందులు, ధరల స్థిరీకరణ, విద్యుత్ సబ్సిడీలు వంటి అంశాలపై రైతులు తమ అభిప్రాయాలను వ్యక్తం చేశారు.
ఈ సమావేశానికి డిప్యూటీ స్పీకర్ రఘురామకృష్ణ రాజు, పీఎస్సీచైర్మన్ రామాంజనేయులు, ఎంపీ బీదా మస్తాన్ రావు, జిల్లా కలెక్టర్, పలువురు ముఖ్య నాయకులు హాజరయ్యారు. ఆక్వా రైతులను ఆదుకోవడానికి ప్రభుత్వం అన్ని విధాలా సహాయం చేస్తుందని డిప్యూటీ స్పీకర్ రఘురామకృష్ణరాజు హామీ ఇచ్చారు. ఆంధ్రప్రదేశ్ ఆక్వాకల్చర్ అభివృద్ధికి ప్రభుత్వం కృషి చేస్తోందని అన్నారు.
అమెరికాకు రొయ్యల ఎగుమతులు ఎక్కువగా జరుగుతున్నాయని, అక్కడ నెలకొన్న పరిస్థితుల కారణంగా ఆక్వా రంగంపై ప్రభావం పడుతోందని రైతులు ఆందోళన వ్యక్తం చేశారు. దీనిపై స్పందించిన అధికారులు, ప్రభుత్వం తరపున అన్ని విధాలా చర్యలు తీసుకుంటామని హామీ ఇచ్చారు.
ఈ సందర్భంగా ఎంపీ బీదా మస్తాన్ రావు మాట్లాడుతూ, రొయ్యల ఫీడ్ ధరలను కేజీకి నాలుగు రూపాయలు తగ్గించినట్లు తెలిపారు. అంతేకాకుండా, భీమవరంలో 80 లక్షల రూపాయలతో ఒక ప్రత్యేక ల్యాబ్ ఏర్పాటు చేస్తామని ఆయన హామీ ఇచ్చారు. రైతుల ఆదాయం పెంచేందుకు ప్రభుత్వం కృషి చేస్తోందని ఆయన అన్నారు.
త్వరలోనే అమరావతిలో ఆక్వా ఇండస్ట్రీ ఎగుమతిదారులతో సమావేశం ఏర్పాటు చేసి, సమస్యలను పరిష్కరిస్తామని అధికారులు తెలిపారు.
