'హ‌రిహ‌ర వీర‌మ‌ల్లు' కొత్త విడుద‌ల తేదీని ప్ర‌క‌టించిన మేక‌ర్స్‌

ప‌వ‌ర్‌స్టార్ ప‌వ‌న్ క‌ల్యాణ్ హీరోగా న‌టిస్తున్న 'హ‌రిహ‌ర వీర‌మ‌ల్లు' సినిమా నుంచి హోలీ పండుగ సంద‌ర్భంగా మేక‌ర్స్‌ బిగ్ అప్‌డేట్ ఇచ్చారు. ఈ చిత్రానికి సంబంధించిన కొత్త విడుద‌ల తేదీని ప్ర‌క‌టించారు. ఈ మేర‌కు ప్ర‌త్యేక పోస్ట‌ర్‌ను విడుద‌ల చేసిన నిర్మాణ సంస్థ మే 9న సినిమాను రిలీజ్ చేస్తున్న‌ట్లు ప్ర‌క‌టించింది. 

ఇక తాజాగా విడుద‌లైన కొత్త పోస్ట‌ర్‌లో ప‌వ‌న్‌తో పాటు క‌థానాయిక నిధి అగ‌ర్వాల్ కూడా గుర్ర‌పు స్వారీ చేస్తూ క‌నిపిస్తున్నారు. ఈ పోస్ట‌ర్ ద్వారా మేక‌ర్స్ ప‌వ‌న్ అభిమానుల‌కు, సినీ ప్రేక్ష‌కుల‌కు హోలీ విషెస్ తెలియ‌జేశారు. కాగా, ఇంత‌కుముందు మార్చి 28న ఈ సినిమాను విడుద‌ల చేయ‌నున్న‌ట్టు మేక‌ర్స్ ప్ర‌క‌టించిన విష‌యం తెలిసిందే. ఇప్పుడు ఆ తేదీని మార్చారు. విడుద‌ల తేదీని మే 9కి వాయిదా వేశారు.  

ఆస్కార్ అవార్డు విజేత ఎంఎం కీర‌వాణి బాణీలు అందిస్తున్న ఈ మూవీకి జ్యోతి కృష్ణ, క్రిష్ జాగర్లమూడి సంయుక్తంగా దర్శకత్వం వహిస్తున్నారు. మెగా సూర్య ప్రొడక్ష‌న్స్ ప‌తాకంపై ఎ. ద‌యాక‌ర్‌రావు నిర్మిస్తున్న‌ ఈ చిత్రాన్ని 17వ శతాబ్దంలో సాగే క‌థ నేపథ్యంలో రెండు భాగాలుగా తీసుకురానున్నారు. ఈ చిత్రంలో పవన్ సరసన నిధి అగర్వాల్ హీరోయిన్‌గా నటిస్తుండగా... బాలీవుడ్ న‌టుడు బాబీ డియోల్, న‌ర్గీస్ ఫ‌క్రీ, నోరా ఫతేహి, సునీల్ తదితరులు కీలక పాత్రలను పోషిస్తున్నారు.