CSK: సొంతగడ్డపై చెన్నై సూపర్ కింగ్స్ టాపార్డర్ వీరవిహారం

గుజరాత్ టైటాన్స్ తో మ్యాచ్ లో చెన్నై సూపర్ కింగ్స్ టాపార్డర్ బ్యాట్లకు పనిచెప్పింది. చెన్నైలోని ఎంఏ చిదంబరం స్టేడియంలో టాస్ ఓడి బ్యాటింగ్ కు దిగిన చెన్నై జట్టు నిర్ణీత 20 ఓవర్లలో 5 వికెట్లకు 206 పరుగులు చేసింది. టాపార్డర్ లో అజింక్యా రహానే (12) తప్ప మిగతా అందరూ గుజరాత్ బౌలింగ్ ను చీల్చి చెండాడారు. 

కెప్టెన్ రుతురాజ్ గైక్వాడ్ 36 బంతుల్లో 5 ఫోర్లు, 1 సిక్స్ తో 46 పరుగులు చేయగా, చిచ్చరపిడుగు రచిన్ రవీంద్ర 20 బంతుల్లోనే 6 ఫోర్లు, 3 సిక్సులతో 46 పరుగులు సాధించాడు. ఈ ఓపెనింగ్ జోడీ తొలి వికెట్ కు 5.2 ఓవర్లలోనే 62 పరుగులు జోడించి ఫ్లయింగ్ స్టార్ట్ ఇచ్చింది.  

ఇక శివాలెత్తినట్టు ఆడిన శివమ్ దూబే 23 బంతుల్లో చకచకా 51 పరుగులు చేశాడు. అతడి స్కోరులో 2 ఫోర్లు, 5 భారీ సిక్సులు ఉన్నాయి. డారిల్ మిచెల్ 24 పరుగులు చేసి ఇన్నింగ్స్ చివర్లో రనౌట్ అయ్యాడు. ఆఖర్లో సమీర్ రిజ్వి 6 బంతుల్లో 2 సిక్సులతో 14 పరుగులు చేశాడు. 

గుజరాత్ టైటాన్స్ బౌలర్లలో రషీద్ ఖాన్ 2, సాయికిశోర్ 1, స్పెన్సర్ జాన్సన్ 1, మోహిత్ శర్మ 1 వికెట్ తీశారు.