Roja: అబ్బా... బీజేపీ కోరితేనే తాను పొత్తుకు ఒప్పుకున్నాడట: చంద్రబాబుపై రోజా సెటైర్లు
- నిన్న ముస్లింలతో చంద్రబాబు ఇఫ్తార్ విందు
- రాష్ట్రాభివృద్ధికి కేంద్ర సహకారం కావాలని చంద్రబాబు వెల్లడి
- అందుకే పొత్తు కుదుర్చుకున్నామని వెల్లడి
- ఈ రోజు సారు నాలుక మడతపెట్టేశారన్న రోజా
టీడీపీ అధినేత చంద్రబాబు కుప్పం నియోజకవర్గంలో నిన్న ముస్లింలతో ఇఫ్తార్ విందులో పాల్గొన్నారు. ఈ సందర్భంగా ఆయన మాట్లాడుతూ, రాష్ట్రం అభివృద్ధి చెందాలంటే కేంద్రం సహకారం అవసరం... మనమేమీ వెళ్లలేదు, వాళ్లే వచ్చారు కాబట్టి ఈ పొత్తు పెట్టుకున్నాం అని వివరించారు. దీనిపై ఏపీ మంత్రి రోజా విమర్శనాస్త్రాలు సంధించారు.
"అబ్బా... బీజేపీ కోరితేనే తాను పొత్తుకు ఒప్పుకున్నాడట. కుప్పంలో మైనారిటీ నాయకులతో జరిగిన మీటింగ్ లో చంద్రబాబు ఈ విధంగా సెలవిచ్చారు. నిజానికి బీజేపీతో పొత్తు కోసం దత్తపుత్రుడు పవన్ కల్యాణ్ తో కలిసి ఢిల్లీలో పడిగాపులు కాసింది అందరికీ తెలుసు. ఈ రోజు సారు నాలిక మడతపెట్టారు. వినేవారు ఉంటే ఎన్ని కథలైనా అల్లుతాడు" అంటూ రోజా ఎద్దేవా చేశారు.
అంతేకాదు, చంద్రబాబు వ్యాఖ్యల వీడియోను కూడా ఆమె పంచుకున్నారు.
