Heroine Surabhi: చావు నుంచి త్రుటిలో తప్పించుకున్నాను: హీరోయిన్ సురభి

‘బీరువా’ సినిమాతో ఎంట్రీ ఇచ్చి ఆ తర్వాత పలు చిత్రాల్లో అలరించిన తెలుగు హీరోయిన్ సురభి.. తాను త్రుటిలో చావు నుంచి తప్పించుకున్నానని చెప్పారు. ఆ విషయాన్ని గుర్తుచేసుకుంటేనే చాలా భయంకరంగా ఉందంటూ సోషల్ మీడియా వేదికగా ఆమె ఒక పోస్ట్ షేర్ చేశారు. ఇదివరకెప్పుడూ ఎదురుకాని ఒక ఘటన ఆదివారం ఎదురైందని, తాను ప్రయాణించిన ఓ విమానం సాంకేతిక లోపానికి గురై ప్రమాదం ఏర్పడే పరిస్థితి ఏర్పడిందని తెలిపారు. విమానం పైలెట్ నియంత్రణలో లేకుండా పోయిందని, ఆ సమయంలో బాగా భయం వేసిందని ఆమె చెప్పారు. అయితే పైలెట్ తెలివైన నిర్ణయం కారణంగా అంతా ప్రాణాలతో బయటపడ్డామని ఆమె వెల్లడించారు.

చావు అంచుల దాకా వెళ్లొచ్చాననే భావన కలిగిందని ఆమె చెప్పుకొచ్చింది. ఆ ఘటన గుర్తుచేసుకుంటే ఇప్పటికీ భయం వేస్తోందని అన్నారు. తాను ఈ రోజు ఇలా బతికుండడంతో తనలోని సానుకూల దృక్పథం పట్ల మరింత నమ్మకం కలిగిందని ఆమె అన్నారు. ఇందుకు సంబంధించిన పోస్ట్ సోషల్ మీడియాలో వైరల్‌గా మారింది. అయితే ఏ విమానం, ఎక్కడికి ప్రయాణిస్తున్న సమయంలో జరిగిందనే విషయాలను హీరోయిన్ సురభి వెల్లడించలేదు.

కాగా హీరోయిన్ సురభి ‘బీరువా’ సినిమాతో ఎంట్రీ ఇచ్చారు. ఆ తర్వాత తెలుగు, తమిళ, కన్నడ భాషల్లో పలు చిత్రాల్లో నటించి మెప్పించారు. తెలుగులో ఎక్స్‌ప్రెస్ రాజా, ఎటాక్, జెంటిల్‌మెన్‌లతో పాటు పలు సినిమాల్లో నటించారు.